Сентябрь ойининг бошида Кубага ёпирилган «Ирма» тўфони сабаб оролда сут эмизувчиларнинг бутун бошли бир тури қирилиб кетди. Катта қулоқ Куба каламушлари (Capromys auritus) табиий офат қурбонига айланди. Бу ҳақда Juventud Rebede газетасига таяниб, «ТАСС» хабар берди.
Ушбу кемирувчилар фақатгина бир жойда — Куба шимолий қирғоқларидаги Кайо-Фрагосо оролида яшаган. Уларнинг узунлиги 28 сантиметрга, думининг узунлиги эса 18 сантиметрга етган. Оғирлиги эса 1—1,5 килограмм бўлган.
Олимларнинг сўзларига қараганда, катта қулоқ кемирувчилари анчадан буён қирилиб кетиш хавфи остида бўлган. «Ирма» тўфонига қадар Кайо-Фрагосода бу турдаги сут эмизувчилардан 88 та атрофида қолган. Ҳозирда биологлар каламушларнинг фақатгина икки донасини топишга муваффақ бўлди, аммо улар яшаб кета олмайди. Тўфон оқибатида бир неча метрлик тўлқинлар оролга ёпирилган бўлиб, кемирувчилар истиқомат қиладиган мангра ўрмонларини сув остида қолдирган.
Шунингдек, Кайо-Фрагосо оролида истиқомат қилувчи юзлаб игуаналар қирилиб кетган, орол бўйидаги кўплаб коралл ва денгиз ўсимликларига зарар етган.
8—10 сентябрь кунлари Куба шимолий қирғоқларига ёпирилган «Ирма» тўфони 10 кишининг ҳаётига зомин бўлди. Минглаб уйлар сув остида қолди, қишлоқ хўжалигига жиддий зарар етди, туристик тузилмалар жабр кўрди.
Фан, технология ва атроф-муҳитни муҳофаза қилиш вазирлиги мутахассисларининг маълум қилишича, тўфон оролдаги мангра ўрмонларига зарар етказган. Айниқса, Кагуанес миллий боғидаги мангралар жиддий зарарланган.
Изоҳ (0)