Тошкентда биринчи марта Бутунжаҳон кубик ассоциациясининг (World Cube Association, WCА) чемпионати ташкил этилади. Бу ҳақда «Kommersant.uz» хабар берди.
WCА тижорат ташкилоти бўлиб, Рубик кубикини тез йиғишни ривожлантиради ва мусобақалар, хусусан, қитъа ва жаҳон чемпионатини ўтказади.
Тошкентда бўлиб ўтадиган чемпионатни Ханнеке Рикс ва Равшанбек Абдуллаев, шунингдек, WCА кенгаши аъзоси ва делегати Рон Бан Брюҳэм ташкил қилади. WCА делегати ассоциациянинг мамлакатдаги вакили бўлиб, барча WCА мусобақалари ўрнатилган қоидалар асосида ўтишини назорат қилади.
Мусобақада иштирок этиш учун 50 нафар иштирокчи танлаб олинади. Унда ҳар қандай хоҳловчи иштирок этиши мумкин. Рўйхатдан ўтиш тўлови жойида тўланади ва 30 минг сўмни ташкил қилади. Батафсил маълумотлар чемпионатнинг расмий сайтига жойланган.
Мусобақада хоҳлаганча йўналишда рўйхатдан ўтиш мумкин. Йўналишлар орасида боғланган кўз билан йиғиш, тез йиғиш, бир қўлда йиғиш, 2х2, 3х3, 4х4, 5х5 кубикларни йиғиш кабилар бор.
Вақт чегараси ҳар бир йўналиш бўйича алоҳида ўрнатилади ва бир дақиқадан олти дақиқагача бўлиши мумкин. Шу блан бирга, кубикни секин йиғган иштирокчининг натижаси ҳам ҳисобга олинади.
Изоҳ (0)