Нидерландия ҳукумати Донбассда ҳалокатга учраган Boeing 777 самолётининг айбдорларини аниқлаш учун олиб борилаётган суд жараёнларига тўққиз миллион евро ажратди. Бу ҳақда Telegraaf газетасига таяниб, «Корреспондент.net» хабар берди.
Нашрнинг маълумотларига кўра, ушбу маблағлар Хавфсизлик ва адлия вазирлигининг келгуси йилдаги бюджети ҳисобидан қопланади. Бундан ташқари кейинчалик, 2023 йилга қадар ушбу мақсадларни амалга ошириш йўлида яна миллионлаб евро сарфланиши режалаштирилган.
Бюджет ҳужжатига берилган изоҳларда таъкидланишича, Нидерландия суд жараёнини ташкиллаштириш ва давлат айблови харажатларини тўлашни ўз зиммасига олади. Шу билан бирга, ҳукумат «ушбу дастур ҳақидаги махфий маълумотлар билан бўлишишнинг олдини олиш мақсадида» гувоҳларнинг ҳимояси учун кетадиган харажатларни ҳам тўлайди.
Эслатиб ўтамиз, 2014 йил 17 июлида Malaysia Airlines авиакомпаниясининг Boeing 777 йўловчи самолёти Амстердамдан Куала-Лумпурга учаётган пайтда Донецк вилояти осмонида уриб туширилган эди. Бунинг оқибатида 283 йўловчи ва 15 нафар экипаж аъзоси, жами ўн мамлакат фуқароси ҳалок бўлганди.
Изоҳ (0)