Вашингтон шаҳрида АҚШ президенти Авраам Линкольн меъморий ёдгорлигини оёқости қилган Қирғизистон фуқароси қўлга олинди. Бу ҳақда Қирғизистон ички ишлар вазирлиги матбуот хизматига асосланиб, «Интерфакс» хабар бермоқда.
«18 сентябрь, душанба куни Вашингтонда АҚШ президенти Авраам Линкольн меъморий ёдгорлигини оёқости қилган қирғизистонлик фуқаро ҳибсга олинди. Келиб тушган маълумотларга кўра, у ёдгорликка танга ёрдамида ўз исмини тирнаб ёзган», — дейди матбуот хизмати ходими.
Қирғизистонлик фуқаро ҳибснинг эртаси куни октябрь ойининг бошига мўлжалланган судда иштирок этиш шарти билан қўйиб юборилган.
«Меъморий ёдгорликка етказилган зарар миқдори икки минг долларни ташкил этади», — дейилади хабарда.
Маълум қилинишича, Қирғизистоннинг АҚШдаги элчихонаси фуқаро билан боғланганида у қилмишидан пушаймонда эканлигини айтган.
Изоҳ (0)