2017 йилнинг сентябрида АҚШга «Харви» ва «Ирма» тўфонлари ёпирилди. Улар ҳам бошқа ўнлаб тропик тўфонлар каби ўз номларига эга бўлди. Бундай тизим у ёки бу табиий хавф-хатарни тезроқ ёдда сақлаш ва бошқаларидан фарқлашга ёрдам беради: аёллар ва эркакларнинг қисқа исмлари ОАВлари ва хабардор қилиш хизматлари томонидан координаталар ўрнига қўлланилади, деб ёзади TJournal.
Экспертларнинг фикрича, номлар тўфонларга яхшироқ тайёргарлик кўришга кўмак беради. Метеорологик ташкилотлар эса исмлар рўйхатини ишлаб чиққан ва одамлар «Катрина», «Сэнди» ва «Ирма»ларни адаштириб юбормаслигини кузатиб боради.
Кемалар, авлиёлар ва опа-сингиллар
Дастлаб кучли пўртаналар ихтиёрий номланган. 1842 йилда ҳалокатли атлантик тўфонлардан бири океаннинг ғарбий қисмида бўлган «Антье» кемаси мачтасини узиб юборган. Циклон «Антье» деб номланган — бу тўфонларга берилган биринчи расмий ном эди. Шундан сўнг асосан вайрон бўлган кемалар ва шаҳарлар шарафига ном беришда давом этилган: мисол учун, Американинг Галвестон шаҳрига 1900 йилда ёпирилган тўфон Галвестон тўфони деб номланган.
Баъзан тропик циклонларга муқаддас номлар берилган. Шу йўл билан Пуэрто-Рикода XIX асрда «Авлиё Анна» ва «Авлиё Филипп» тўфонлари пайдо бўлган.
Бироқ бундай усул ноқулай эди: аниқ тизимсиз доимий чалкашликлар юзага келар эди. XIX аср охирида австралиялик метеоролог Клемент Рагг тропик циклонларга аёллар исмларини бера бошлади. Иккинчи жаҳон уруши даврида бу анъанани америкалик ҳарбийлар ҳам давом эттирди: АҚШ флоти метеорологлари Тинч океанидаги тўфонларни рафиқалари, дўстлари ва опа-сингиллари шарафига номлаган.
1953 йилда Бутунжаҳон метеорология ташкилоти томонидан АҚШ Миллий тўфон маркази кўмагида тайёрланган тўфон ва кучли пўртаналар учун номланишларнинг халқаро тизими пайдо бўлди. Дастлаб рўйхатда фақат аёлларнинг қисқа исмлари бўлиб, улар циклонларга алифбо бўйича берилган: биринчи тўфон «А» ҳарфи билан бошланган ва шундай давом этган. 1979 йилда «гендер тенгсизлик» олдини олиш учун кенгайтирилган рўйхатга эркаклар исмлари ҳам киритилган.
«Арлин» дан «Уиттни»гача
Биринчи рўйхат Атлантика океанида юзага келадиган пўртаналар учун яратилган. Бир неча йилдан сўнг бундай тизим тропик циклонлар пайдо бўладиган бошқа ҳудудларда ҳам қўллана бошлади. Ҳар бир ҳудуднинг ўз номлари бор. Уларнинг барчаси WMO сайтида чоп этилган.
Атлантика рўйхати энг машҳур рўйхат ҳисобланади — бу рўйхатдаги номлар билан аталган тўфонлар АҚШга ёпирилади. Атлантика океани 21 та номни ўз ичига олувчи жами олтита рўйхатга эга. 2017 йилда исмларнинг бир тўплами, 2018 йилда — иккинчиси қўлланади. 2022 йилда 2013 йилнинг рўйхати яна такрорланади.
Исмлар ҳам навбатма-навбат қўйилади — дастлаб алифбо тартибида аёллар исмлари, сўнгра эркаклар исмлари келади. «Q», «U», «Х», «Y» ва «Z» ҳарфлари ташлаб кетилади. Шамол барқарор тезлиги соатига 62 километрдан ортиқ бўлган тўфонларга ном берилади.
2017 йилда Атлантика океанида «Арлин», «Брет», «Синди», «Дон», «Эмили», «Франклин», «Герт», «Харви», «Ирма», «Хосе» ва «Катя» тўфонлари бўлиб ўтди. Йил якунига қадар «Ли», «Мария», «Нэйт», «Офелия», «Филипп», «Рина», «Шон», «Тамми», «Винс» ва «Уиттни» пайдо бўлиши мумкин. Агар йил давомида рўйхат тугаб қолиб, пўртаналар юзага келишда давом этса, улар грек алифбоси ҳарфлари билан номланади.
2014 йилда Американинг Proceedings of the National Academy of Sciences илмий журналида тадқиқот чоп этилди. Унга кўра, аёллар исмлари берилган тўфонлар эркаклар исмлари берилганларга қараганда кўпроқ вайронкор оқибатлар келтириб чиқаради. Бироқ бу тадқиқотни бошқа олимлар танқид қилди.
«Тўфон кучи ва ҳажми ҳамда унинг номланиши ўртасида ҳеч қандай боғланиш йўқ», — дейди Миллий об-ҳаво хизмати ходими Сьюзан Бучанян.
Тўфонлар учун истеъфо
«Харви» ва «Ирма» каби циклонлар вайронкор оқибатлар ва ОАВларида эсга олиниши билан бошқа тўфонларга қараганда кўпроқ ёдда қолади. Шунинг учун бу исмларни бир неча йилдан кейин яна қўллаш чалкашликларга олиб келиши мумкин. Шундай ҳолатлар олдини олиш учун WMO ҳар йили йиғилиш ўтказиб, уларда қайси номларни «муомаладан чиқариш» кераклигини муҳокама қилади.
Рўйхатдаги номларни алмаштиришнинг асосий сабабларидан бири — циклон давомида жабрланганлар учун унинг оғриқли эканлиги. 1953 йилда тизим қабул қилингандан буён рўйхатдан 82 та ном олиб ташланган. Улар орасида — «Катрина», «Сэнди» ва «Игорь» каби машҳур тўфонлар бор. 2016 йилда «Метью» ва «Oттo» исмлари муомаладан чиқарилди.
«Ирма» охирги ўнйилликда Атлантикада юзага келган энг кучли тўфонлардан бири эканлиги таъкидланмоқда. Шунинг учун келгуси йилда бу исм бошқасига алмаштирилиши мумкин. «Ирма» эса Атлантика ҳудудидаги «I» (Irma) ҳарфи билан бошланувчи «истеъфо»га чиққан ўнинчи тўфонга айланади.
Изоҳ (0)