Россия Вашингтонга чегаралари яқинида ҳарбий операция ўтказишга йўл қўймайди. Бу ҳақда Федерация кенгаши халқаро қўмитаси раҳбари Константин Косачев маълум қилди. Бу ҳақда «Газета.ru» хабар бермоқда.
У шу тариқа АҚШ Давлат котиби Рекс Тиллерсоннинг Вашингтон Корея муаммосини тинч йўл билан ҳал этишга ҳаракат қилиши, бироқ ҳарбий вариантни ҳам истисно этмаслиги ҳақидаги баёнотига муносабат билдирди.
«Шимолий Корея ташқи аралашувдан ўзини ҳимоя этиш учун барча имкониятларни ишга солади. Бундай таҳдид мавжуд экан, КХДР ва унинг расмийлари ядро дастурини амалга оширишни давом эттиради. Биз Пхеньян қандай имкониятларга эга эканлигини унчалик яхши билмаймиз, бироқ улар аниқ мавжуд ва бу нафақат минтақа, балки бутун дунё, жумладан, АҚШ учун ҳам ўта аянчли якунланади», — таъкидлади Косачев.
Сенатор Шимолий Кореядан анча узоқ бўлган АҚШ бундай «қалтис тажрибалар» ҳақида гапириши мумкинлиги, бироқ Россия учун «ҳазилнинг мавриди эмаслиги»ни билдирди.
Эслатиб ўтамиз, олдинроқ АҚШнинг БМТдаги доимий вакили Никки Хейли агар АҚШ ўзини ёки иттифоқдошларини ҳимоя қилишига тўғри келса, Шимолий Корея йўқ қилинишини айтганди.
Изоҳ (0)