Малайзиялик жангарилар роҳинжалар атрофидаги танглик туфайли Мьянмага жўнади

ИШИД террорчилик гуруҳи билан боғлиқлиги бўлган малайзиялик жангарилар мусулмон роҳинжалар манфаатларини ҳимоя қилиш баҳонаси билан Мьянмага жўнаб кетди. Бу ҳақда Малайзия полициясининг аксилтеррорчилик департаменти раҳбари ёрдамчиси Аюб Хон Мидинга таяниб, «ТАСС» хабар берди.

Унинг сўзларига кўра, ИШИД экстремистлари «янги жангариларни ёллаш учун роҳинжа омилидан фойдаланмоқда». Полициячилар, шунингдек, «Мьянма Сурия ва ҳатто Филиппиннинг жанубий туманларидан кўра, Малайзияга анча яқинроқ» эканлигини таъкидлади. «Айнан роҳинжа халқи атрофидаги вазият экстремистларга ‘жиҳод‘ учун биринчи даражали мақсадга айланди», — дея қўшиб қўйди у.

Бундан ташқари, аксилтеррорчилик департаменти вакили маълум қилишича, тезкор ахборотга кўра, Мьянма ғарбида Индонезиядан келган жангарилар ҳам бўлиши мумкин.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.