Эрон «барча бомбаларнинг отаси» билан мақтанди

Эрон мудофаа саноати вазни тахминан 10 тонна чиқадиган бомба тайёрлади. Бу ҳақда Эрон Ҳарбий-ҳаво кучлари ва Ҳарбий-космик кучлари қўмондони Амир Али Хожизоданинг баёнотига таяниб, «РИА Новости» хабар берди.

Қўмондоннинг сўзларига кўра, қуролни «Ил-76ТД» самолётидан ташлаш мумкин. Бомба кучли вайронкор кучга эга. «Агар АҚШда бомбаларнинг онаси бўлса, Эронда бомбаларнинг отаси бор», — деб таъкидлаган Амир Али Хожизода.

Очиқ маълумотларга кўра, Эрон ёнғинни ўчириш учун ва авиация транспорти эҳтиёжлари учун мўлжалланган учта «Ил-76ТД» самолётига эга.

АҚШ Қуролли Кучлари жорий йилнинг 13 апрель куни Афғонистондаги ИШИД террорчилари объектларига «барча бомбаларнинг онаси» ҳисобланадиган ўзининг энг қудратли авиабомбаси — GBU-43/B’ни ташлаган эди.

GBU-43/B бомбаси 2000 йилларнинг бошида ишлаб чиқилган бўлиб, у АҚШ Қуролли Кучлари ихтиёридаги энг кучли ноядровий бомба ҳисобланади. Бомбанинг оғирлиги 9,5 тонна, қуввати — тротил эквивалентида 11 тонна.

Афғонистондаги ИШИД марраларига «барча бомбаларнинг онаси» ёрдамида зарба берилиши оқибатида камида 90 нафар жангари ҳалок бўлган.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.