Ўзбекистон пинчак силат федерацияси томонидан ташкил этилган Asian Fight—2017 мусобақаси аввалдан ваъда қилинган машҳурларсиз ўтди. Бу ҳақда «Оламспорт» нашри хабар берди.
Мусобақа анонсларида Голливуд киноактёри Жан Клод Ван Дамм, UFC йўналиши етакчилари Фёдор Емельяненко ҳамда Жефф Монсонларнинг Тошкентга фахрий меҳмон сифатида ташриф буюриши айтилганди. Аммо турнирга 3 кун вақт қолганида уларниннг ҳеч бири пойтахтга кела олмаслиги маълум қилинди.
Мана шу уч меҳмон ўрнига бошқа бир киноактёр, айкидо спорт тури орқали жаҳонга машҳур бўлган Стивен Сигалнинг етиб келаётгани айтилди. Сигал чиндан ҳам Тошкентга келди ва бир қатор тадбирларда иштирок этди. Бироқ асосий мусобақа — Asian Fight—2017 да у ҳам кўриниш бермади.
Бунинг сабаблари ташкилотчилар томонидан ошкор қилинмаган. Сигал талаб қилган барча пуллар тўлаб берилгани ва Ван Дамм ҳисобига ўтказилган пуллар тақдири қандай кечгани борасида ҳам аниқ маълумот йўқ.
Asian Fight—2017 чипталари 50 мингдан бошлаб, 300 минг сўмга қадар сотилганди. Якунда 34.800 мухлисни ўз бағрига сиғдира оладиган «Бунёдкор» стадионига бор-йўғи 15 минглар чамаси ишқибоз ташриф буюрган. Уларнинг неча фоизи бепул таклифнома ва бейджиклар билан стадионга киритилгани борасида аниқ маълумот йўқ.
K-1 йўналишида муваффақиятли одимлаётган, Хитой ва Таиланд жангчилари орасида катта обрў қозонаётган ўзбекистонлик Анвар Бойназаров ҳам Asian Fight турнирига ташриф буюра олмаган. Бу ҳолат авиарейс билан боғлиқ муаммо сифатида изоҳланди. Қолган 7 ўзбекистонлик жангчи эса «Бунёдкор» стадионида жанг қилди.
Изоҳ (0)