«ОФК бошлаган текширув Эрон — Сурия ўйинига тааллуқли эмас». Муаммо — Қатар билан келиша олмай қолган араб давлатларида

Футбол мутахассиси Алишер Никимбаевнинг сўзларига кўра, ОФК ЖЧ—2018 саралаши доирасидаги Эрон — Сурия (2:2) учрашуви юзасидан текширув бошлагани ҳақидаги гап-сўзлар — уйдирма.

«ОФК сайтида бундай янгилик йўқ. У ерда ‘сиёсий бетарафлик тамойили’ бузилгани юзасидан текширув олиб борилаётгани ҳақида хабар бор. Вазиятдан бохабар ҳар қандай инсон бу гаплар Қатар ва бошқа араб мамлакатлари ўртасидаги дипломатик можарога алоқадор эканини тушуниб турибди. Ақллироқ бўлинг, фитналарга учманг», — деб ёзган Алишер Никимбаев.

Никимбаевнинг алоҳида таъкидлашича, ОФК ахборотида «келишилган ўйинлар» ҳақида ҳеч нима дейилмаган. «Шундан хулоса қилиши мумкинки — бу Қатарнинг beIN Sports телеканали билан боғлиқ муаммолар масаласидир», — деб ёзади Никимбаев.

Маълум бўлишича, Саудия Арабистони ва Япония терма жамоалари ўртасидаги ЖЧ—2018 саралаш учрашувига Қатарнинг beIN Sports телеканали ижодкорлари жамоаси қўйилмаган. Мазкур телеканал эса бундай ўйинларни трансляция қилиш бўйича эксклюзив ҳуқуқларга эга эди.

Аввалроқ ОФК сайтида «сиёсий бетарафлик тамойили» бузилгани муносабати билан, 5 сентябрь куни ўтказилган ЖЧ—2018 саралаш учрашувлари юзасидан текширув бошлангани ҳақида хабар берилган эди.