Human Rights Watch ташкилотининг Ўзбекистонда бўлиб турган делегацияси аъзолари Ички ишлар вазирлигида бўлиб, тизим фаолияти билан танишди. Бу ҳақда «Ўзбекистон 24» хабар бермоқда.
Уларга Ички ишлар вазирининг виртуал қабулхонаси ва ишонч телефонлари, вазирлик, унинг ҳудудий бўлимлари сайтлари фаолияти хусусида батафсил маълумот берилди.
Шунингдек, меҳмонлар ички ишлар органлари тизимида, жумладан, жазони ўташ муассасаларида маҳкумлар ҳуқуқларини ҳимоя қилиш борасида амалга оширилаётган ишлар билан ҳам яқиндан таништирилди.
Мулоқотлар давомида делегация аъзолари Ўзбекистон Республикасининг жиноят ва жиноят-процессуал кодексларининг айрим моддалари хусусидаги қизиқишларини билдирди. Уларга мазкур ҳуқуқий ҳужжатлар ва унда белгиланган меъёрлар ҳақида ҳам тушунчалар берилди.
Human Rights Watch Европа ва Марказий Осиё бўлинмаси директори Хью Уильямсон ва ташкилотнинг Марказий Осиё бўйича офиси директори Стивен Свердлов Президентнинг Тошкент шаҳридаги Халқ қабулхонасида ҳам бўлди.
Изоҳ (0)