Италиянинг Сардиния оролидан маҳаллий пляж қумини хорижга эсдалик сифатида олиб кетмоқчи бўлган тўрт нафар сайёҳнинг ҳар бири минг евродан жаримага тортилди. Бу ҳақда The Sun газетаси хабар берди.
Сайёҳларга Сардиниядан қум олиб кетишни тақиқлаш ҳақидаги қоида август ойининг бошида кучга кирган. Бу тўрт нафар сайёҳ янги қоидани бузган дастлабки кишилар бўлди. Уларнинг қайси мамлакатдан келганлиги аниқлаштирилмаган.
Бундай қоидабузарлик учун жариманинг энг юқори миқдори бир киши учун уч минг еврони ташкил қилади. Сардиния раҳбарияти пляжлардаги ўғриликлардан норози бўлган маҳаллий аҳолининг шикоятлари ва ОАВларда сайёҳларнинг бундай хатти-ҳаракати юзасидан бўлиб ўтган баҳслардан сўнг шундай қоидани жорий қилган.
Оролда жойлашган Кальяри Элмас халқаро аэропортининг маълумотларига кўра, 2015 йилнинг ёзида ҳаво кемалари йўловчиларидан беш тоннадан кўпроқ қум олиб қўйилган.
Изоҳ (0)