Бекобод шаҳридаги «Ўзбекистон металлургия комбинати»да базалт толасидан маҳсулотлар ишлаб чиқарилмоқда. Бу ҳақда «Ўзбекистон 24» телеканали хабар берди.
Базалт ишлаб чиқариш учун Жиззах вилоятидан тоғ тошлари келтирилмоқда. Хом ашёси тошдан олинадиган, ўтда ёнмайдиган бундай маҳсулотлар замонавий қурилиш соҳасида зарур ҳисобланади.
Ўзбекистон Президенти Шавкат Мирзиёев бу маҳсулотдан уй-жой қурилишида, янги ишлаб чиқариш қувватларини барпо этишда, дастгоҳлар, энергетик қувурлар ва қурилиш конструкцияларини қоплаш учун кенг кўламда фойдаланиш, импортни камайтириш учун комбинатда сендвич-панеллар тайёрлаш ҳажмини кескин ошириш зарурлигини уқтирди.
Иссиқда салқин бўлади, совуқда иссиқ бўлади. Бу табиатнинг бизга берган инъоми, десак ҳам тўғри бўлади. Стандартларни ўзгартириш керак.Кўп қурилишларга ғишт керак эмас. Болалар боғчаси, мактаб, шифохонага, майли, ғишт керакдир. Катта-катта ишлаб чиқариш корхоналари, тўқимачилик комбинатларига ғиштнинг нима кераги бор?
Аввало, бу маҳсулот харидорлари кафолатланган бўлиши керак. Иккинчидан, ҳамма вилоятларда темирйўл компанияси қошида бу маҳсулотни тарқатадиган ташкилот тузилиши керак.
Масалан, қиши совуқ Қорақалпоғистон, Хоразмга бу маҳсулот жуда керак, лекин улар — у ердаги қурувчилар ҳам, ташкилотлар ҳам буни билмайди.
Бундай хом ашё ҳамма давлатларда ҳам мавжуд эмас. Бизга Худо берган бўлса-ю, биз бундан ҳам фойдаланмасак. Табиат инъомини халқимизга тушунтиришимиз керак. Ўзбекистонни тоши ҳам пул!
Шавкат Мирзиёев, Ўзбекистон Президенти
Изоҳ (0)