Ўзбекистон Президенти Шавкат Мирзиёевнинг «Ўзбекистон Республикасининг фан ва техника, адабиёт, санъат ва меъморчилик соҳасидаги Давлат мукофотларини бериш тўғрисида»ги фармони билан тиббиёт соҳасининг бир гуруҳ етакчи олимлари тақдирланди.
Соғлиқни сақлаш вазирлиги (ССВ) ахборот хизматининг хабар беришича, Республика ихтисослаштирилган педиатрия илмий-амалий тиббиёт маркази илмий бўлим раҳбари, тиббиёт фанлари доктори, профессор Флора Иноятова, Республика ихтисослаштирилган педиатрия илмий-амалий тиббиёт маркази директори, тиббиёт фанлари доктори, профессор Дилором Аҳмедова, Республика ихтисослаштирилган педиатрия илмий-амалий тиббиёт маркази профессори, ТошPTI кафедра мудири ва тиббиёт фанлари доктори Шавкат Амонов «Оғир эшитиш заифлиги ва карлиги бўлган болаларнинг реабилитацияси» амалий тадқиқоти учун биринчи даражали Давлат мукофоти билан тақдирланди.
Вазирлик ахборот хизмати тадқиқот муаллифларининг ушбу йўналишдаги долзарб мавзуни амалга ошириш жараёни, Ўзбекистонда ушбу муаммонинг ечими қандай ҳал қилинаётганлиги ва унинг самарадорлиги хусусидаги фикрларини эълон қилди.
Жаҳон соғлиқни сақлаш ташкилоти маълумотига кўра, ҳар 1000 нафар чақалоқдан 1 нафари кар бўлиб туғилади ва бола 1—2 ёшга тўлганда бу кўрсаткич 2 бараварга кўпаяди.Марказ олимлари томонидан «Оғир эшитиш заифлиги ва карлиги бўлган болалар реабилитацияси (ўзбек модели)» илмий-амалий дастури доирасида 4000 дан ортиқ ўғил-қизлар текширувлардан ўтказилди. 5 ёшгача бўлган 300 нафар кичкинтойга давлат бюджети ҳисобидан, 54 нафарига имплант ишлаб чиқарувчи компаниянинг мурувват ёрдами ва 5 ёшдан катта бўлган 29 нафар болага имтиёзли кредит ҳисобидан кохлеар имплантация бажарилди.2014 йилгача оғир эшитиш заифлиги ва карлик мавжуд бўлган болалар кохлеар имплантация учун чет элларга боришга мажбур эди. Бу эса катта молиявий сарф-харажатларни талаб қилар, аммо шунчалик оворагарчилик ҳам иш бермас эди. Негаки, имплантация қилинган ўғил-қизларда операциядан кейинги реабилитация тадбирлари ўтказилмас, натижада жарроҳлик амалиёти самараси сезилмасди.
Ҳамкасбларимиз билан олиб борган тадқиқотимиз айни шу муаммо ечимига қаратилган. 2014—2016 йилларда энг замонавий эшитиш имплантлари қўлланилиши асосида 300 нафар болада кохлеар имплантация операцияси бажарилиши режалаштирилиб, давлатимиз томонидан барча шароит яратиб берилди.
Дилором Аҳмедова, Республика ихтисослаштирилган педиатрия илмий-амалий тиббиёт маркази директори
«Ўзбекистонлик олимларнинг оғир эшитиш заифлиги ва карлиги бўлган болаларнинг реабилитациясига бағишланган тадқиқоти биринчи даражали Давлат мукофотига муносиб кўрилгани юртимизда ушбу масала ечимига катта эътибор қаратилаётганини яна бир карра исботлайди», — деб ёзади ССВ ахборот хизмати.
Қайд этишларича, имплантация қилинган болалар саломатлиги бўйича ўтказилган мониторинг натижалари 90 фоиз ижобий натижага эришилганини кўрсатди. Яъни, бемор болаларнинг эшитиш қобилияти тикланиб, гапира бошлаган. 7 ёшга кирганлари эса умумтаълим мактабларида ўз тенгқурлари қаторида таҳсил олмоқда.
Президентимизнинг бугунги ишончи бизга катта масъулият юкламоқда. Уни оқлаш, болалар саломатлиги йўлидаги изланиш ва тадқиқотларимизни жадал олиб бориш, фан-техника ютуқларини янада ривожлантириш ва энг муҳими халқимизни тиббиётдан рози қилиш йўлида бор илм ҳамда куч-ғайратимизни аямаймиз.Маълумот учун, Республика ихтисослаштирилган педиатрия илмий-амалий тиббиёт маркази қошида 40 ўринга мўлжалланган махсус «Туғма ва орттирилган ЛОР аъзолари касалликлари» янги бўлими ишга туширилди. У замонавий тиббий ускуналар билан жиҳозланган ҳамда маҳаллий ёш шифокорлар Россия, Австрия, Франция, Россия, Польша, Словакия, Италия, Украина каби давлатларнинг етакчи клиникаларида таҳсил олиб қайтишди.Дилором Аҳмедова, Республика ихтисослаштирилган педиатрия илмий-амалий тиббиёт маркази директори
Изоҳ (0)