Украина шарқидаги қуролли низо ҳудудида 2014 йилдан бери 2,7 мингдан зиёд тинч аҳоли вакиллари ҳалок бўлди. Бу ҳақда Халқаро Қизил Хоч қўмитасининг Украинадаги бўлинмаси маълум қилди, дея хабар бермоқда «РБК».
«Украинадаги ҳарбий низо давомида 2 700 дан зиёд тинч аҳоли вакили ҳалок бўлди, бир миллиондан зиёд оила ўз уйларини ташлаб чиқишга мажбур бўлди», — дейилади ташкилот ҳисоботида.
Бундан ташқари, Халқаро Қизил Хоч жанговар ҳаракатлар ҳудудида бўлган болалар сонини ҳам ҳисоблаб чиқди. Ҳисоб-китобларга кўра, низо қамраб олган ҳудудларда 500 минг бола истиқомат қилади.
2017 йил баҳорида БМТнинг Украинадаги инсон ҳуқуқлари бўйича Мониторинг миссияси Украинадаги қуролли низо қурбонлари сони бўйича ўз ҳисоб-китобларини тақдим этган эди. Унга кўра, урушнинг уч йили давомида салкам 10 минг киши ҳалок бўлган (бу рақам ҳам тинч аҳоли вакилларини, ҳам тўқнашувларда ҳалок бўлган ҳарбийларни ҳисобга олган).
Изоҳ (0)