Жанубий Африка Республикаси президенти Жейкоб Зума ой бошида Ёҳаннесбургдаги тунги клубда аёлга қўл кўтарган олий таълим вазири ўринбосари Мдудузи Мананани лавозимидан озод этди. Бу ҳақда «ТАСС» хабар бермоқда.
Можаро ижтимоий тармоқларда юқори мартабали амалдор Мандиза Дума исмли аёлни ураётгани акс этган видеолар, шунингдек, калтакдан кейинги асорат суратлари тарқалиб кетганидан сўнг кўтарилди.
Манананинг ҳаракатлари мамлакатда ҳукмрон Африка миллий конгресси партияси томонидан қораланди, полиция ишлари бўйича вазир Фикиле Мбалула эса ҳукумат мазкур ҳолат бўйича иш очиб, суриштирув олиб бораётганини маълум қилган эди.
33 ёшли Манананинг ўзи эса Думадан, унинг оила аъзолари ва бутун Жанубий Африка халқидан узр сўради. «Очиқ-ойдин провокацияга қарамай, мен ўзимни батартиб тутишим лозим эди», — деди у. Жанжал сабаблари ҳозирча расман эълон қилингани йўқ, бироқ ижтимоий тармоқлардаги маълумотга кўра, аёл Мананани «бесоқолбоз» деб атаган.
Мазкур можаро ЖАРда аёлларни зўравонликдан ҳимоя қилишга қаратилган ойлик ўтказилаётган вақтда юз берди — аёлларни зўрлаш ва уларга куч ишлатиш мамлакатда кенг тарқалган жиноятлардан биридир. Кўплаб жамоат ташкилотлари Манананинг истеъфосини талаб қилган эди.
Изоҳ (0)