Тошкент ахборот технологиялари университетида 1 август куни бўлиб ўтган тест имтиҳонлари вақтида қатъий инсоний ва техникавий назорат ўрнатилганига қарамай, алоҳида абитуриентлар ташқаридан ёрдам олишга уринишлардан тийила олмади. Бу ҳақда «Газета.uz» хабар бермоқда.
Маъум бўлишича, бир қатор абитуриентларнинг саволлар китоби кўчага отиб юборилган ва уларни ҳуқуқни муҳофаза қилиш органлари ходимлари топиб олган. «Газета.uz» мухбири Давлат тест маркази вакили Севара Зуфархўжаева билан биргаликда варақаси кўчага отилган абитуриентларни излаган.
Севара Зуфархўжаеванинг сўзларига кўра, абитуриентлар ўз саволлар китобини уларни кўчадан олдиндан келишилган одамлар топиб, тестларни ишлаб, сўнг ҳар турли айланма йўллар билан бино ичига олиб кириб беришига умид қилиб, кўчага улоқтирган.
«Қоидабузарлик телекоммуникация технологиялари факультетига ўқишга кириш учун ҳаракат қилаётган уч абитуриент томонидан амалга оширилган бўлиб чиқди. Бу абитуриентлар аудиториядан олиб чиқилди ва имтиҳонлардан четлатилди», — дейилади «Газета.uz» хабарида.
Аввалроқ бу йилги тест имтиҳонлари вақтида ТАТУда татбиқ этилган биометрик назорат тизими ўзини оқлагани, шу тизим қўлга туширган 16 «формали зайчик» ҳақидаги хабарлардан сўнг ТАТУ қабул комиссиясидан аризаларини қайтариб олган абитуриентлар сони ошгани ҳақида хабарлар берилган эди.
Изоҳ (0)