Бу йил Тошкент ахборот технологиялари университетида биринчи марта татбиқ этилган абитуриентлар киришини биометрик назорат қилиш тизими 1 август куни бўлиб ўтган кириш имтиҳонларида ўзининг самарадорлигини кўрсатди. Бу ҳақда «Газета.uz» хабар бермоқда.
Биометрик идентификация қурилмалари университетнинг марказий биносига, шунингдек, ТАТУнинг тест имтиҳонлари ўтказилган Тошкент алоқа касб-ҳунар коллежи ва Юнусобод туманидаги етти мактабга ўрнатилган эди.
Имтиҳон аудиториясига кириш учун абитуриент Давлат тест маркази (ДТМ) гувоҳномаси ва паспортни кўрсатиши, шунингдек, бармоғини биометрик модулга теккизиши лозим эди.
Мавзуга доир: Тошкент ахборот технологиялари университетидаги тест имтиҳонлари — «Дарё» фоторепортажида
Университетнинг бевосита марказий биносида қарийб 5000 абитуриентдан фақат 2 нафари биометрик тизимни алдашга уринди. Уларнинг ҳар иккиси ҳуқуқни муҳофаза қилиш органларига топширилган. Бошқа абитуриент номидан ТАТУ имтиҳонларига киришга уринган «зайчиклар»нинг якуний сони ҳозирда ҳисобланмоқда.
Эслатиб ўтамиз, ТАТУда 5 июль куни бўлиб ўтган махсус факультетга кириш бўйича тест имтиҳонларида 16 нафар «формали зайчиклар» қўлга тушган эди. Уларнинг бари биометрик назорат тизими томонидан фош этилган.
Изоҳ (0)