Фарғона вилояти ИИБ томонидан хабар қилинишича, Учкўприк туманида яшовчи И.Т 2017 йил 23 июлда туман ИИБга ариза билан мурожаат қилган. Унинг аризасига кўра, 22 июлдан 23 июлга ўтар кечаси, соат 05:30 да унинг хонадонига уч нафар юзига қора ниқоб кийиб олган номаълум шахс девор ошиш йўли билан кирган.
Аризада маълум қилинишича, ниқобли шахслар уйнинг биринчи қаватидаги хонада яшовчи турмуш ўртоғининг жияни Қ.Х.нинг оёғини боғлаб, ундан хонадон эгасининг пуллари қаерда туришини сўраб, унга дўқ-пўписа қилган. Шундан сўнг улар ҳовлида турган Captiva автомашинаси салонида бўлган 100 000 сўм пулларни олиб, орқа эшик орқали номаълум томонга қочиб кетган.
ИИБ ходимларининг олиб борган тезкор суриштирув ишлар натижасида ушбу босқинчилик жиноят аслида бўлмаганлиги, Қ.Х. ёлғон гувоҳлик бергани аниқланди.
Қ.Х. жиноят натижасида етказилган моддий зарар ҳисобланган 100 000 сўм миқдордаги пулларни 2017 йил 22 июль, соат тахминан 04:00 да Captiva’дан ўзи яширинча олиб, шу куни бозорда савдо қилаётган онаси А.М.нинг савдо дўкони кассасидаги пуллар орасига жиноят натижасида топилган мулк эканлигини яширган ҳолда қўшиб юборган.
Аниқланишича, Қ.Х. босқинчилик жинояти содир этилгани тўғрисидаги гапларни мазкур хонадонда яшовчи севган қизи Н.Т.га совчилар келишининг олдини олиш мақсадида ўйлаб топган.
Қ.Х. Ўзбекистон Республикаси Жиноят Кодексининг 169-моддаси билан гумонланувчи сифатида тергов жараёнига жалб этилган. Ҳозиэги вақтда дастлабки тергов ҳаракатлари давом этмоқда.
Изоҳ (0)