27 июль, пайшанба куни «Ўзбекистон» телеканали орқали «Биз учун муҳим» ток-шоусининг навбатдаги сони тўғридан-тўғри эфир орқали узатилди. Бу сафарги кўрсатув 1 августдаги тест имтиҳонларига бағишланди.
Кўрсатувда экспертлар сифатида Ўзбекистон Республикаси Олий ва ўрта махсус таълим вазирлигининг Кадрлар тайёрлаш ва олий таълим муассасаларини ташкилий-методик таъминлаш бош бошқармаси бошлиғининг ўринбосари Барно Ражабов, Давлат тест маркази бўлим бошлиғи Қаюм Боймиров, Шарқшунослик институти ректори Абдураҳим Маннонович, Тошкент темир йўл муҳандислари институти ректори Маъруфжон Расулов, ҳуқуқшунос Хушнудбек Худойбердиев, шунингдек, адабиётшунос Омонулла Мадаев, «Ўзбекистон овози» газетасининг бош муҳаррири Сафар Остонов, оммавий ахборот воситалари вакиллари ва абитуриентлар иштирок этди.
Дастур давомида 730 мингга яқин абитуриентларни қийнаётган масалалар юзасидан турли саволлар берилди. Ўқитувчи ва томошабинлар томонидан турли таклифлар тақдим этилди. Адабиётшунос Омонулла Мадаев тестларда бериладиган саволларни тандиқ остига олди.
Филология факультетига топшираётган абитуриент учун бериладиган она тили фанидан саволлар билан Тошкент тиббиёт академиясига топшираётган абитуриентнинг она тилидаги тест саволлари бир-биридан фарқ қилиши керак. Ахир қандай қилиб филолог билан бошқа мутахассисликка кирмоқчи бўлган абитуриентларга бир хил даражадаги саволлар берилади? Бошқа фанларда ҳам худди шундай. Тарихчилар учун тарих фанидан саволлар қийинроқ бўлиши, филологлар учун тарих фанидан саволлар осон бўлиши керак. Саволларни ўқиб кўрганмисиз ҳеч? Бир-биридан узун, мураккаб саволлар. Маориф тизимидаги 39 йиллик тажрибамда бунақа саволларни кўрмаганман. Бу каби саволларни фарзанди йўқ одам тузган, деб ўйлайман.Бундан ташқари ижодий имтиҳони бор институт ёки университетларда имтиҳонни бевосита кузатиб бориш учун назорат камераларини қўйиш лозимлиги, олий таълим муассасаларига қабул жараёни имтиҳонлари тестини онлайн равишда ўтказиш каби таклифлар билдирилди.Шунингдек, ўқишга қабул қилиш имтиҳонларига иншо ёзишни ҳам жорий этиш керак. Ўқишга кирган талабаларнинг кўп қисми тўғри ёзишни ҳам билмайди.
Омонулла Мадаев, адабиётшунос.
Олий ва ўрта махсус таълим вазирлиги ҳамда Давлат тест маркази вакиллари бу борада кераклича ишлар қилинаётганини, келгуси йилларда юқорида билдирилган таклифлар албатта инобатга олинишини маълум қилди.
Изоҳ (0)