Ўзбекистон Марказий банки ва Давлат солиқ қўмитасининг маълумотларига кўра, республикадаги саккиз мингта хўжалик юритувчи субъектда 12 мингта терминалга талаб бор. Бу ҳақда 26 июлда бўлиб ўтган Халқаро пресс-клубнинг йиғилишида Марказий банк раиси ўринбосари Саидкамол Хўжаев маълум қилди.
Қайд этилишича, мамлакатда атиги битта маҳаллий ишлаб чиқарувчи бўлгани учун юзага келган эҳтиёжни ўз вақтида қондириш имкони бўлмаган. Шу сабабли тижорат банкларига хориждан терминалларни мустақил сотиб олиш имконияти берилган. Шу билан бирга, маҳаллий ишлаб чиқарувчи ҳам терминал етказиб беришда давом этди.
Хориждан сотиб олинган терминаллар Ягона умумреспублика прецессинг маркази базасига уланиб, у ерда техник талабларга мослиги текширилади. Маълум қилинишича, июль ойида чет элдан 30 мингта терминал олиб келиниши керак, бугунги кунда 17 мингта олиб келинган ва улар процессинг марказида текширувдан ўтказилмоқда. Қолган 13 мингтаси 1 августгача олиб келинади.
Саидкамол Хўжаевнинг таъкидлашича, олиб келинган терминаллар мавжуд 12 мингта эҳтиёжни қоплайди ва шу билан бирга, захира ҳосил бўлади.
Ўзбекистон Президенти Шавкат Мирзиёевнинг 2017 йил 15 февралдаги «Пул билан боғлиқ муносабатларни такомиллаштириш ва пластик карточкалардан фойдаланган ҳолда ҳисоб-китобларни ривожлантириш тўғрисида»ги қарорига асосан, жорий йилнинг 1 мартидан бошлаб чакана савдо ва пулли хизматларни кўрсатиш соҳасида аҳолидан пластик карталар орқали тўловларни қабул қилиш учун ҳисоб терминаллари билан таъминланмаган тадбиркорлик субъектлари, жумладан, якка тартибдаги тадбиркорларга фаолият олиб бориш тақиқланган эди.
Давлат солиқ қўмитаси раисининг ўринбосари Ҳотамбек Шокировнинг айтишича, бугунги кунда терминал учун банкка ариза бериб, ҳалигача терминал ола олмаган тадбиркорлар истисно тарзида жаримага тортилмаяпти.
Изоҳ (0)