Халқаро пресс-клубнинг 26 июлда бўлиб ўтган сессиясида иштирок этган Марказий банк раиси ўринбосари Саидкамол Хўжаев яқин вақт ичида жисмоний шахсларга бозор курсида валюта сотиб олиш ва сотиш, ўзбек сўмини банкоматларда хоҳлаганча нақдлаштириш имконияти берилишини айтиб ўтди.
Журналистлар томонидан валютанинг эркин конвертацияси ва пластик карталардаги пул маблағларини нақдлаштириш учун ўрнатиладиган банкоматлар юзасидан берилган саволга жавоб берган Марказий банк вакили бу борада бир қатор ишлар олиб борилаётганини ва янгиликлар бўлишини таъкидлади.
Шу билан бирга, Саидкамол Хўжаев айни пайтда жисмоний шахсларга халқаро пластик карталарда хорижий валюта сотилаётганини ва бу валютадан фақат хорижий мамлакатларда фойдаланиш мумкинлигини қўшимча қилди.
Банкоматлар масаласига тўхталган Марказий банк раиси ўринбосари ўн минг сўмлик купюраларнинг чиқарилиши банкоматлар ўрнатилиши йўлида қўйилган биринчи қадам эканлигини қайд этди.
Таъкидланишича, банкоматлар ишлаши учун купюраларни банкоматга жойлаштириш, улардан неча киши пулларни нақдлаштириши мумкинлиги каби бир қатор масалалар ҳал қилиниши керак.
Албатта, пластик картада бўлган миллий валютадаги маблағларни нақдлаштириш амалда бўлиши керак бўлган нарса. Бироқ буни босқичма-босқич амалга оширишга мажбурмиз. Ҳозирги кунда пул-кредит сиёсатида амалга оширилаётган ишлар ўзининг маълум натижасини бергач, ўзбек сўмини банкоматларда хоҳлаган вақтда хоҳлаганча нақдлаштириш имконияти бўлади. Тез орада бу имкониятлар пайдо бўлади.Саидкамол Хўжаев, Ўзбекистон Марказий банки раиси ўринбосари
Изоҳ (0)