O‘zbekiston Markaziy banki va Davlat soliq qo‘mitasining ma’lumotlariga ko‘ra, respublikadagi sakkiz mingta xo‘jalik yurituvchi subyektda 12 mingta terminalga talab bor. Bu haqda 26-iyulda bo‘lib o‘tgan Xalqaro press-klubning yig‘ilishida Markaziy bank raisi o‘rinbosari Saidkamol Xo‘jayev ma’lum qildi.
Qayd etilishicha, mamlakatda atigi bitta mahalliy ishlab chiqaruvchi bo‘lgani uchun yuzaga kelgan ehtiyojni o‘z vaqtida qondirish imkoni bo‘lmagan. Shu sababli tijorat banklariga xorijdan terminallarni mustaqil sotib olish imkoniyati berilgan. Shu bilan birga, mahalliy ishlab chiqaruvchi ham terminal yetkazib berishda davom etdi.
Xorijdan sotib olingan terminallar Yagona umumrespublika pretsessing markazi bazasiga ulanib, u yerda texnik talablarga mosligi tekshiriladi. Ma’lum qilinishicha, iyul oyida chet eldan 30 mingta terminal olib kelinishi kerak, bugungi kunda 17 mingta olib kelingan va ular protsessing markazida tekshiruvdan o‘tkazilmoqda. Qolgan 13 mingtasi 1-avgustgacha olib kelinadi.
Saidkamol Xo‘jayevning ta’kidlashicha, olib kelingan terminallar mavjud 12 mingta ehtiyojni qoplaydi va shu bilan birga, zaxira hosil bo‘ladi.
O‘zbekiston Prezidenti Shavkat Mirziyoyevning 2017-yil 15-fevraldagi “Pul bilan bog‘liq munosabatlarni takomillashtirish va plastik kartochkalardan foydalangan holda hisob-kitoblarni rivojlantirish to‘g‘risida”gi qaroriga asosan, joriy yilning 1-martidan boshlab chakana savdo va pulli xizmatlarni ko‘rsatish sohasida aholidan plastik kartalar orqali to‘lovlarni qabul qilish uchun hisob terminallari bilan ta’minlanmagan tadbirkorlik subyektlari, jumladan, yakka tartibdagi tadbirkorlarga faoliyat olib borish taqiqlangan edi.
Davlat soliq qo‘mitasi raisining o‘rinbosari Hotambek Shokirovning aytishicha, bugungi kunda terminal uchun bankka ariza berib, haligacha terminal ola olmagan tadbirkorlar istisno tarzida jarimaga tortilmayapti.
Izoh (0)