“Megafon” operatorni almashtirish niyatida bo‘lgan mijoziga 2999-yilga qadar 25 foizli chegirma taqdim etdi

Rossiyaning “Megafon” kompaniyasi o‘z abonentiga aloqa xizmatlari uchun 2999-yil 31-dekabrga qadar 25 foiz chegirma berdi. Bu haqda Magadanda yashovchi va familiyasini oshkor etishni istamagan Dmitriy Twitter’dagi sahifasida ma’lum qildi, deya xabar beradi “Vedomosti”. 

Muxolifatchi Aleksey Navalniyning Xalq shtabi xodimi bo‘lgan Dmitriy “Megafon” abonent xizmatiga 15-iyunda kompaniya jamoatchilik bilan aloqalar direktori Pyotr Lidov tviti tufayli murojaat etdi. Lidov unda Rossiyada 12-iyunda o‘tkazilgan korrupsiyaga qarshi ommaviy namoyishlar ishtirokchilarini “ona suti og‘zidan ketmagan degeneratlar” ( aksiya qatnashchilari va qo‘lga olinganlar orasida voyaga yetmaganlar ham ko‘p edi) deb atagandi. Ertasiga u mushtariylar oldida uzr so‘radi. 

Dmitriy operator abonent xizmatiga murojaatiga mazkur tvitga havolani ilova qildi, uning tahqirlovchi mazmundaligi, shu sababli operatorni almashtirish niyatida ekanligini bildirdi. “Megafon” vakillari oradan bir oy o‘tib — 17-iyulda mijozga javob qaytardi va xodimining (Lidov yaqin orada iste’fo berishi ma’lum qilindi) qilmishi uchun uzr so‘radi. 

“Hurmatli mijoz! Sizga 2999-yil 31-dekabrga qadar 25 foizli chegirma taqdim etildi”, — deyiladi abonent xizmati xabarida. 

Dmitriy hozircha operatorni almashtirish niyatida emas.