Трампнинг кортежи нечта машинадан иборат ва улар нима вазифаларни бажаради?

АҚШ президенти Дональд Трампнинг автоколоннаси 14—26 машинадан иборат. Исроилнинг WallaNews портали уларнинг ҳар бири ҳақида батафсил ҳикоя қилади, деб ёзади «Аргументи и факти».

«Катта йигирмалик» саммити Гамбург аҳолисига Америка президентининг улкан кортежи билан ҳам ёдда қолди.

АҚШ президенти автомобиллари кетма-кетлигини ташкил этиш логистика нуқтаи назаридан мураккаб операция ҳисобланади. Бир томондан президентга ҳужум қилишга уринишга ҳам йўл қўймаслик, иккинчи томондан ҳужум юз берган тақдирда уни қайтариш лозим. Ҳар бир машина экипажи ўз ҳудуди учун жавоб беради.

1. Маршрут автомобили ва «олдинга қаровчи» автомобиль

Биринчи автомобиль президент йўлга чиққан йўналиш бўйича бир неча дақиқа олдинда юради. Унинг экипажи кўз билан кузатишдан ташқари, бошқа кўплаб имкониятларга эга ва кортежга ҳаммаси жойидалиги ҳақида ҳисоб беради. «Олдинга қаровчи» автомобиль ҳам юқоридаги вазифаларни бажаради, бироқ кортеждан тахминан бир дақиқа олдинда ҳаракатланади.

2. Тозаловчилар

Бу кортеж бошида ҳаракатланувчи олтитадан 20 тагача автомобиль ва мотоциклдир. Уларнинг вазифаси президент ҳаракатланишини нохосдан тўхташини истисно этиб, тўсиқсиз ҳаракатланишини жисмоний таъминлашдан иборат. Улардан баъзилари ён томондаги кўчаларни бекитиш учун олдинга чиқади. Тўсиқ чиққан ҳолатларда тозаловчилар тўқнашув олдидан ҳам тўхтамайди. Улар йўлда кутилмаганда пайдо бўлган, хавфли кўринган машинани йўлдан суриб чиқариш ҳуқуқи ва имкониятига эга.

3. Йўлбошловчи автомобиль

Асосий конвойнинг биринчи автомобили. Одатда у махфий хизматнинг Chevrolet Suburban’идир. Бу президент лимузини олд буферидир. Кутилмаган тўсиқ юзага келган тақдирда тозаловчилар каби ҳуқуқларга эга, шубҳали машинага зарба бериш техник имкониятлари эса янада кўпроқ.

4. «Асосий таом»

Президент лимузини қўриқчилар тилида «Кичкина карета» кодланган номи билан аталади. Кўриниши ойналари қорайтирилган Cadillac’ни эслатади, аслида эса у GM оғир платформадаги зирҳли машинадир. Мотор қуввати оширилган. Зирҳли эканлигидан ташқари, кимёвий ва биологик қурол қўлланадиган ҳужумларга ҳам қарши тура олишга қодир. Қоронғида кўриш жиҳозлари билан таъминланган.

Баъзан бу каби лимузинлар колоннада икки ва ундан ортиқ бўлади. Иккинчи автомобиль, биринчидан, заҳира учун керак, иккинчидан, президент айнан қайси машинада ҳаракатланаётганини ҳеч ким билмаслиги лозим. Ушбу мақсадда лимузинлар доимий равишда колоннадаги ўрни, баъзан эса рақамларини ҳам ўзгартириб туради. Лимузинлар ҳайдовчилари экстремал ҳайдаш бўйича мутахассислардир. Президент автопарки жами 12 тадан 16 тагача ана шундай лимузинга эга бўлиб, улар президент узоқ сафарларга чиққан ҳолатларда унинг етиб бориш жойлари бўйича олдиндан тақсимланади.

5. Хавфсизлик хизмати

У ҳам Chevrolet Suburban, америкаликлар уларни жуда яхши кўради. Уни колоннада ажратиш осон — унда полиция чироқлари ва том қисмида қўшимча фаралар бўлади. Деразалари доим очиқ, улардан автоматли қўриқчиларни кўриш мумкин.

6. Радиоэлектрон хавфсизлик машинаси

Яна бир Chevrolet Suburban бўлиб, унда полиция чироқлари ўрнига автомобилнинг том қисмида антенналар бўлади. Президент ҳаракатланаётган йўналишдаги ҳар қандай сигнални ўчириш учун мўлжалланган. Ушбу машина ҳозир эканлигида президентга учувчисиз учар қурилма ёки бошқарилувчи ракета билан ҳужум қилиш имконсиз.

7. Тезкор жавоб қайтариш гуруҳи

Улар ҳам Chevrolet Suburban бўлиб, уларда ҳақиқий ремболар бўлади. Уларнинг вазифаси президент лимузини хавфли ҳудудни тезликда тарк этиши лозим бўлган вазиятларда жангга киришишдир.

8. Разведка автомобили

Президент йўналиши «картинаси»ни тўлиғича кўрувчи коммуникация маркази. У турли манбалар, жумладан, кузатув вертолётлари ва учувчисиз учар қурилмалардан олинган маълумотларни мувофиқлаштириб боради. Президент ташриф буюрадиган давлат полиция ва махсус хизматлари билан алоқага эга. Ташқи томондан таниб олиш қийин эмас, у одатда тижорат юк автомобили ёки фургондир.

9. Қурол-яроғ ва хавфли материаллар омбори

Одатда Ford ёки Chevrolet юк машинаси. Ғилдиракдаги қурол-яроғ омбори. Президент қўриқчилари йўлда қурол-яроғ билан боғлиқ муаммога дуч келмайди. Унда кимёвий ҳужум оқибатларини бартараф этиш воситалари ҳам мавжуд.

10. Коммуникация машинаси

Яна бир Chevrolet Suburban. У ҳам кўплаб сунъий йўлдош алоқаси антенналарига эга бўлган ғалати кўринишга эга. Президентни алоқанинг барча турлари, жумладан интернет билан таъминлайди. Шифрлаш қурилмаси ҳам унда жойлашган.

11. Ёрдамчи персонал машиналари

Улар бир нечта. Бундай машиналар президентнинг рафиқаси, фарзандлари, вазирлар маҳкамаси аъзолари, шифокорлар, маслаҳатчилар, ҳарбий инқироз ҳолатларида катта офицерлар учун алоҳида-алоҳида. Ядровий чамадонча ҳам шу машиналарда эканлиги тахмин қилинади.

12. Матбуот

Президент саройи журналистлари ва матбуот котиблар президент билан бирга ҳаракатланиши мумкин. Улар одатда алоҳида белгиларсиз ва зирҳсиз фургон ёки микроавтобусда, кортежнинг охирида ҳаракатланади.

13. Тез ёрдам

Президентга нимадир бўлганда ва уни шифохонага етказиш имконияти мавжуд бўлмаган ҳолатлар учун мўлжалланган.

14. Кортеж охиридаги қўриқлов қисми

Албатта президентга олдиндан ёки ён томонлардан ҳужум қилиниши кутилади. Бироқ кортежнинг охирини ҳам очиқ қолдириб бўлмайди. Бу президент кортежининг орқа буферидир. Улар автомобиллар ёки мотоцикллардан иборат.

Президент кортежини кўрганлар унинг кўриниши узунроқ эканлигига эътибор қаратган. Гап шундаки, юқорида санаб ўтилган автомобилларга одатда маҳаллий полиция ва махсус хизматлар машиналари ҳам қўшилади.

Давлат раҳбарларини қўриқловчи махсус хизматлар барча хавф-хатарни эътиборга олиши лозим.

Тарихда «йўлдаги» раҳбарларга кўплаб суиқасдлар уюштирилган. Улардан энг машҳури Австрия-Венгрия тахти меросхўри эрс-герсог Франс Фердинанднинг ўлдирилишидир.

1963 йилда АҚШ президенти Жон Кеннеди снайпер қурбонига айланган эди. Шундан кейин Америка етакчилари очиқ лимузинларда ҳаракатланишни тўхтатди. Ҳозирги зирҳли машиналарда автомобилга ўтириш ва ундан чиқиш лаҳзалари энг хавфли саналади. Мисол учун, Роналд Рейган лимузинга яқинлашиш чоғида оғир яраланган эди.