Франциялик адиб ўз китобида қаҳрамоннинг ўлимини тасвирлаб бериб, ўзи ҳам худди шу тарзда вафот этди

Франциянинг Ле-Ман шаҳрида француз ёзувчиси ва собиқ судья Жан-Мишель Ламбер вафот этди, деб ёзади France Info портали.

Адибнинг жасади ўз уйидаги ишхонасидан 11 июль куни топилди. Ламбернинг бошида пластик пакет бўлиб, у бўйинбоғ ёрдамида бўйнига ўралган эди.

«Ҳеч қандай ўлдириб кетиш белгилари топилмади», — дея аниқлик киритди Ле-Ман прокурори. Полициячилар хонадондан бостириб кириш ёки курашиш аломатларини ҳам топа олмади.

Дастлабки версияга кўра, 65 ёшли ёзувчи ўз жонига қасд қилган. Ўлимнинг аниқ сабаби тиббий экспертиза натижасида белгиланади.

Таъкидланишича, ўлим юз берган вазият Ламбернинг 2014 йилда чоп этилган сўнгги китобидаги саҳнани тўлиғича такрорлайди. Асар қаҳрамони профессор Шабер ўз жонига қасд қилиб, ўлимидан олдин эса мактуб ёзиб қолдиради.