Сурхондарё вилояти Қумқўрғон туманидаги шифокорларнинг нотўғри ташхиси туфайли бир қиз қўлсиз қолди. Бу ҳақда вилоят ҳокими Эркинжон Турдимовнинг Facebook’даги саҳифасида маълум қилинган.
Хабар беришларича, Қумқўрғон туман тиббиёт бирлашмасида вилоят ҳокими, кенг жамоатчилик ва тиббиёт ходимлари иштирокида очиқ мулоқот бўлиб ўтган. Тадбир қачон ўтказилганига аниқлик киритилмаган.
Вилоят ҳокимининг Facebook’даги саҳифасида қолдирилган хабарга кўра, «тумандаги шифокорларнинг нотўғри ташхиси туфайли Норой Ўринованинг қўлидаги дард узоқ муддат тузалмаган, натижада қўлини кесишга мажбур бўлган».
Шунингдек, Рашид Мустанов, Сарвар Бойқулова, Муҳаббат Мусаева, Бинор Пардаева, Малика Чориева, Фазилат Хуррамовага туман тиббиёт бирлашмаси томонидан сифатли тиббий хизмат кўрсатилмагани боис, «ҳали-ҳамон дарддан азият чекиб юрибди».
Қайд этишларича, мазкур фуқароларга мулоқот жараёнининг ўзида малакали шифокорлар бириктирилиб, уларнинг соғлигини тиклаш масаласи юзасидан тегишли чоралар белгиланган.
Изоҳ (0)