Кичик Трамп ўзининг Веселницкая билан учрашуви тафсилотларини сўзлаб беришга тайёр эканлигини билдирди

АҚШ президентининг ўғли кичик Дональд Трамп россиялик адвокат Наталья Веселницкаяга боғлиқ учрашув юзасидан қасам ичиб кўрсатма беришга тайёр эканлигини маълум қилди, деб хабар берди «Интерфакс».

Fox News телеканали журналистлари томонидан учрашув ҳақида барчасини қасам ичган ҳолда айтиб беришга тайёрмисиз деган саволга у «Барчасини» дея жавоб берди.

Аввалроқ, бундай таклифни АҚШ Сенатидаги демократик озчилик етакчиси Чак Шумер билдирганди, у «Бизга кичик Дональд Трампнинг қасам ичган ҳолда берган кўрсатмалари зарур, у бу воқеа юзасидан кўрсатмаларини бир неча бор ўзгартирди», дея таъкидлаган эди.

Аввалроқ, хорижий ОАВда кичик Трамп ўтган йилнинг июнида, АҚШ президентлигига сайловлар бошланиши олдидан «Кремль билан алоқаси бор» ва АҚШ президентлигига номзод Ҳиллари Клинтон борасида маълумотларга эга дея тахмин қилинаётган Веселницкая билан учрашгани ҳақида хабарлар тарқалган эди. Учрашувда сайловолди штабининг раҳбари Пол Манафорт ва Долналд Трампнинг куёви — Жаред Кушнер ҳам қатнашган.

Кичик Трамп ва Кушнернинг вакиллари учрашув ҳақидаги фактни тасдиқлаган. Уларнинг таъкидлашича, учрашувда фарзанд асраб олиш дастури муҳокама қилинган ва сайлов мавзуси ҳақида сўз бормаган.

Веселницкая NBC телеканалига берган интервьюсида ўзида ҳеч қачон Клинтоннинг номини булғайдиган маълумот бўлмаганини сўзлаган.