Халқ депутатлари Наманган шаҳар кенгашининг навбатдан ташқари сессияси бўлиб ўтди. Бу ҳақда «Дарё» мухбири хабар берди.
Сессияда ташкилий масала кўрилди. Вазирлар Маҳкамаси Қишлоқ ва сув хўжалиги, қишлоқ хўжалиги маҳсулотларини қайта ишлаш ҳамда истеъмол товарлари масалалари ахборот-таҳлил департаменти мудири бўлиб ишлаб келган Шавкатжон Абдураззоқов Наманган шаҳар ҳокими этиб тайинланди.
Шавкатжон Абдураззоқов 1976 йилда Наманган шаҳрида туғилган. Наманган саноат-технология институти ҳамда Президент ҳузуридаги Давлат ва жамият қурилиши академиясини тамомлаган.
У 2015—2017 йилларда Наманган тумани ҳокими лавозимида фаолият юритган, февраль ойида эса Вазирлар Маҳкамаси департаменти мудири этиб тайинланганди.
Эслатиб ўтамиз, Ўзбекистон Президенти Шавкат Мирзиёев вилоят фаоллар йиғилишида йўл қўйган камчиликлари учун Наманган шаҳар ҳокими Баҳодир Бекхўжаевни ишдан олганди.
Изоҳ (0)