Россия президенти Владимир Путин G20 саммити якунлари бўйича ўтказилган матбуот анжуманида «телевизордаги Дональд Трамп ҳақиқийсидан сезиларли фарқ қилишини» айтиб ўтди. Бу ҳақда Meduza хабар бермоқда.
«У мутлақ теран, суҳбатдошини тўлақонли тўғри тушунади, етарлича тез таҳлил қилиб, қўйилган масалаларга жавоб беради», — деди Путин.
«Шунинг учун ҳам, назаримда, агар биз муносабатларимизни кечаги суҳбатимиз қандай кечган бўлса, шундай қура олсак, бизга зарур бўлган муносабатлар даражасининг бир қисмини бўлса-да қайта тиклай оламиз, деб тахмин қилса бўлади», — дея қўшимча қилди Россия президенти.
G20 саммити доирасида Путин ва Трампнинг илк ўзаро учрашуви бўлиб ўтди. Хабар беришларича, ёпиқ эшиклар ортида ўтган мазкур учрашувда Суриядаги вазият, кибержиноятчилик, шунингдек, Россиянинг АҚШдаги сайловларга аралашгани эҳтимоли масалалари муҳокама қилинган.
Изоҳ (0)