Ўзбекистонда Миллий банк ва Халқ банки хусусийлаштирилмаслиги белгиланди

Ўзбекистонда Халқ банки ва Ташқи иқтисодий фаолият Миллий банки хусусийлаштирилмайди. Бу ҳақда «Новости Узбекистана» хабар бермоқда.

Ўзбекистон Президентининг «Давлат мулки объектларини сотиш жараёнларини янада такомиллаштириш чора-тадбирлари тўғрисида»ги қарорига мувофиқ мазкур банклар хусусийлаштирилмайдиган давлат мулки объектлари рўйхатига киритилди.

Қабул қилинган ҳужжат доирасида Президент ва ҳукумат қарорига асосан мамлакатдаги ўнта акциядорлик-тижорат банки хусусийлаштирилиши мумкин. Улар қаторига «Турон банк», «Ўзсаноатқурилишбанк», «Асака» банки, «Қишлоққурилишбанк», «Агробанк», «Ипотекабанк», «Микрокредитбанк», «Алоқабанк», «Ўзагроэкспортбанк» ва «Ипак йўли» банки кирди.

Ўзбекистонда бугунги кунда Марказий банк таснифи бўйича 27 та тижорий банк мавжуд. Улардан учтаси — Миллий банк, Халқ банки ва «Асака» банки давлат молиявий муассасалари тоифасига киритилган. 11 таси акциядорлик-тижорат, саккизтаси хусусий ва бештаси чет эл капитали иштирокидаги банклар ҳисобланади.