Кредитга Lacetti олиб беришни ваъда қилган фирибгар аёл тошкентликнинг 2,5 минг доллар пулини олиб қўйди

2017 йилнинг 1 февраль куни Махсудова Гулчехра Нормўминовна Мирзо Улуғбек тумани ҳудудида фуқаро Хотамов Вохиднинг ишончига кириб, унга Lacetti 2 русумли автоуловни кредит маблағи ҳисобидан олишга ёрдам беришини ваъда қилиб, алдов йўли билан 2 500 АҚШ доллари миқдоридаги пулларни қўлга киритган. Бу ҳақда Тошкент шаҳар Ички ишлар бош бошқармаси расмий сайти хабар берди.

Мазкур ҳолат юзасидан Мирзо Улуғбек тумани ИИБ ҳузуридаги Тергов бўлими томонидан Ўзбекистон Республикаси ЖКнинг 168-моддаси 1-қисми (фирибгарлик, яъни ўзганинг мулкини алдаш ва ишончни суиистеъмол қилиш йўли билан қўлга киритиш) аломатлари билан жиноят иши қўзғатилган.

Ҳозирда дастлабки тергов ҳаракатлари давом эттирилиб, унинг бошқа жиноятларга алоқадорлиги текширилмоқда.

«Жабрланувчининг анкета маълумотлари ўзгартирилган бўлиб, фамилияси ва исми ҳар қандай ўхшашлиги тасодифий ҳарактерга эга», — дейилади хабарда.