«Мажбурий обуна йўқ!» деб айтган «Халқ сўзи» муҳаррирининг даъвосига дарҳол қарши далиллар келтирилди (видео)

«Ўзбекистон» телеканалида Қуддус Аъзам муаллифлигида эфирга узатиладиган «Муносабат» кўрсатувининг 26 июнь сони «Оммавий ахборот воситалари ва замон» мавзусига бағишланди.

Мажбурий обуна муаммоси — кўрсатувга таклиф қилинган меҳмонлар томонидан қизғин муҳокама қилинган масалалардан бири бўлди. Мавзу журналист Дилшод Бўриевнинг «мажбурий обуна қилиш ҳолатлари — бор гап» қабилидаги мулоҳазаларидан сўнг очилди.

Мажбурий обуна ҳақида гап бўлди. Бу бор гап. Суриштириб келсангиз, бу ерда ҳам қайсидир маънода коррупция бор. Босим билан обуна қилдирилади. Бу нарса барибир барҳам топади. Лекин фақат давлат нашрлари мажбурий обуна қилади, дейиш ҳам нотўғри.

Дилшод Ҳамроев, журналист

Кўрсатувнинг асосий спикерларидан бири — «Халқ сўзи» газетаси бош муҳаррири ўринбосари Шуҳрат Жабборов ёш ҳамкасбининг мажбурий обуна борасидаги фикрларига қатъий норозилик билдирди. Хусусан, у очиқ-ойдин: «Мажбурий обуна йўқ!», — деб айтди.

Сиз тазйиқ остида мажбурий обуна қилиняпти, дедингиз. Ҳатто бу гапни коррупциягача олиб бориб тақадингиз. Бу гапларингизга мен мутлақо қўшилмайман. Шуни билингки, газета — тарғибот дегани. Газета одамларга яхши нарсаларни тарғиб қилади. Газета — мафкура дегани. Шундай экан, биз бу газетамизни, керак бўлса, жойларга борганда тарғиб қиламиз, ўқишга даъват қиламиз, қизиқтиришга ҳаракат қиламиз. Буни эса сиз мажбурий обуна деб атаяпсиз. Бу нотўғри. Мажбурий обуна йўқ!

Шуҳрат Жабборов, «Халқ сўзи» газетаси бош муҳаррири ўринбосари

«Халқ сўзи» вакили ўз фикрларини тугатар-тугатмас, унинг: «Мажбурий обуна йўқ!», деган гапи студияда баҳс-мунозараларни келтириб чиқарди. Кўпчилик Шуҳрат Жабборовнинг баёнотидан норозилик билдираётган вақтда «Жамият» газетаси бош муҳаррири Бекзод Шукуров асосан студияга қаратиб: «Сизни кимдир мажбур қилдими обуна бўлишга?», деб савол қўйди. Бу саволга жавобан «Бекажон» газетаси адабий муҳаррири Каримберди Тўрамурод ўзи бевосита гувоҳ бўлган воқеани сўзлаб берди.

Мен ҳали вилоят халқ таълими бошқармаси, туман халқ таълими бўлими, шифохоналарни гапириб ўтирмайман. Ўзим қатнашган диний идорадаги йиғилиш ҳақида айтиб бераман. Вилоят имом-хатиби ҳар бир туман имом-хатибларини турғазиб: «‘Халқ сўзи’га 200 тадан кам обуна бўлсанг, имомликни топшир», деди.

Каримберди Тўрамурод, «Бекажон» газетаси адабий муҳаррири

Каримберди Тўрамурод бу воқеа қачон, айнан қайси вилоятда юз берганига аниқлик киритмади. «Бекажон» муҳаррирининг бу сўзларига «Адолат» газетаси бош муҳаррири Ислом Ҳамроев шу заҳоти: «Бўлмаган гап бу!», деб муносабат билдирди. Бекзод Шукуров эса яна савол қўйди: «Каримберди ака, сиз саволга жавоб беринг — сизни кимдир обуна бўлишга мажбур қилдими?».

Каримберди Тўрамурод бу саволга ҳам жавоб қайтарди: «Мен жавоб бераман — ‘Халқ сўзи’га мажбуран обуна бўлганман. Мактаб директори мажбур қилган. Ўқитувчи эдим. Ойлигимдан ушлаб қолган. ‘Халқ сўзи’га, деган. Тамом».

«Бекажон» муҳаррирининг дадил жавобидан хафсаласи пир бўлган «Жамият» газетаси раҳбари қўлини силтаб: «Э, гапни бундай олиб қочманг-да», — деди, холос.