Россия давлат думасининг давлат қурилиши ва қонунчилик бўйича қўмитаси «майда безорилик» моддасининг амал қилишини турар-жойларга ҳам жорий этишни таклиф қилувчи қонун лойиҳасини биринчи ўқишда қабул қилишни тавсия этди, деб ёзади Meduza.
Майда безорилик деганда хусусан, «фуқароларга ҳақоратли хиралик қилиш» ва қўпол сўкиниш кўзда тутилмоқда.
Қонун лойиҳаси муаллифлари маъмурий ҳуқуқбузарликлар ҳақидаги кодекснинг ушбу моддасидан «жамоат жойларида» деган тафсилотни олиб ташлашни таклиф қилмоқда. Шу тариқа, улар турар-жойларда, шу жумладан, «оилавий-маиший низолар асосида» амалга ошириладиган қоидабузарликлар учун жазолаш имконини бермайдиган «ҳуқуқий камчилик»ни бартараф этмоқчи.
Шунингдек, қонун лойиҳасида майда безорилик учун жарималарни кўпайтириш ва ушбу модда бўйича жазо тури сифатида мажбурий ишларни жорий қилиш таклиф этилмоқда. Маъмурий қамоқнинг максимал муддатини аввалгидек 15 сутка деб қолдиришни таклиф қилишмоқда.
Давлат думасининг баъзи депутатлари ушбу қонуннинг зарурлиги юзасидан шубҳа билдирмоқда. «Қандай қилиб улар оилада сўкинган ҳар бир кишини 15 суткага қамамоқчи?» — деди депутатлардан бири анонимлик шарти остида. Шу билан бирга, у ваколатли қўмита тасдиқлаганидан сўнг қонун лойиҳаси қабул қилинишига ишонч билдирди.
Изоҳ (0)