19 июнь, душанба куни Россия Давлат думасида Россия Либерал-демократик партияси вакили Василий Власов томонидан блогерлар кенгашининг очиқ мажлиси ташкил қилинди, деб ёзади «Ведомости». Унда ушбу партия етакчиси Владимир Жириновский, Дума вице-спикери Пётр Толстой, турли интернет-нашрлар бош муҳаррирлари ва таниқли блогерлар қатнашди.
Депутатлар «фикрлар етакчилари» билан мулоқот ёшлар ишлари бўйича қўмита базасида доимий бўлиши керак, деган қарорга келди. Толстой блогерларга пропуск ёзиб берилишини ваъда қилди, Жириновский эса блогерлар жамоатчилик билан анъанавий матбуотдан фарқли равишда «фикрлар етакчилари» сифатида мулоқот олиб боришига умид билдирди: «Матбуотда цензура бор, улар юқоридан нима дейишларини кутиши керак, сизларда эса бундай нарса йўқ, шу сабабдан сиз жамоатчиликка фикрларни тезроқ етказа оласиз».
Ташкилотчилар таъкидлашича, улар барчани: Алишер Усмоновни ҳам, Алексей Навальнийни ҳам, бошқа таниқли видеоблогер ва журналистларни ҳам таклиф қилганини таъкидлади.
Аммо Навальний штаби раҳбари Леонид Волков Навальнийга ҳеч қандай таклифнома келмагани, келганида ҳам, «табиийки бормаган бўлиши, чунки бу аҳмоқона нарса эканлиги»ни айтди. «Устига-устак Навальний блогер эмас, балки президентликка номзод», — дея қўшиб қўйди мухолифатчи.
«Биз Усмоновга ва Навальнийга ‘ВКонтакте’ орқали таклифнома юбордик, биз уларни бу ерга куч билан судраб олиб кела олмаймиз», — дея аниқлик киритди Власов.
Изоҳ (0)