26 август куни Флойд Мейвезер ҳамда Конор МакГрегор ўртасида жанг бўлиб ўтиши маълум. Ташкилотчилар эндиликда бокс мухлисларини қизиқтираётган бир қатор масалаларни очиқлади.
Фаолиятини енгилмас боксчи сифатида якунлаган Мейвезер ҳамда UFC чемпиони МакГрегор рингга чиққани учун 100 миллион доллардан мукофот пули олади. Бунда ғолиб чиқиш ёки мағлуб бўлиш ҳақида гап бораётгани йўқ — шунчаки рингга чиқиб бергани учунгина 100 миллион!Ташкилотчилар жангдан 636 миллион АҚШ доллари қийматида соф фойда олишни режалаштирган. Бу бокс тарихидаги рекорд сумма ҳисобланади.
Лас-Вегасдаги T-Mobile Arena’да ўтадиган жанг Showtime телеканали орқали трансляция қилинади. Кечанинг асосий тўқнашувига қадар Мейвезерга қарашли промоутерлик компаниясига тегишли боксчилар иштирокида рейтинг жанглари бўлиб ўтади.
Профессионал фаолияти давомида 49 та жанг ўтказган Мейвезерга қарши МакГрегор карьераси давомида илк бор бокс қоидалари асосида жанг қилади. 12 раундлик жангда спортчилар 10 унсийлик қўлқоплардан фойдаланади. Бунда вазн меёри 69,85 килограмм экани эътироф этилган.