Ўзбекистон ташқи ишлар вазири Абдулазиз Комилов 5 июль куни ватандошлар билан тўғридан-тўғри мулоқот ўтказади. ТИВ матбуот хизмати ахборотига кўра, вазирга ҳозирданоқ мурожаатлар келиб тушмоқда.
Мурожаатларнинг асосий қисмини хорижга чиқиш ва хориждан қайтиш, хорижда бўлган вақтда ёрдам олиш, шунингдек, Ўзбекистоннинг ташқи сиёсий фаолияти билан боғлиқ масалалар ташкил этади.
Айни вақтда, ТИВ матбуот хизматининг алоҳида қайд этишича, «Ўзбекистон терма жамоасининг сўнгги халқаро ўйинлари натижаларидан ранжиган футбол мухлислари номидан тушган мурожаат ҳақида ҳам вазир хабардор қилинган».
Ташқи ишлар вазирлигидан маълум қилишларича, «барча мурожаатлар рўйхатга олинмоқда», мурожаатлар ўрнатилган тартибда кўриб чиқилгач, фуқароларга расмий жавоблар ва тегишли изоҳлар берилади.
Маълумот учун, футбол бўйича Ўзбекистон миллий терма жамоаси 12 июнь куни ЖЧ—2018 саралаш баҳслари доирасида Теҳронда Эронга 0:2 ҳисобида имкониятни бой берди. Мазкур учрашувдан сўнг футбол жамоатчилиги миллий терма бош мураббийи Самвел Бабаяннинг истеъфосини талаб қилган эди.
Ўзбекистон футбол федерацияси 15 июнь куни махсус баёнот билан чиқиш қилиб, Бабаян бошлиқ мураббийлар штаби камида 5 сентябрга қадар ишлашини маълум қилди — шу куни миллий терма ЖЧ—2018 саралашидаги сўнгги ўйинни ўтказади.
Изоҳ (0)