«Ўзбекистон 24» телеканали 2017 йилнинг июнь ойи охиригача ишга тушади. Бу ҳақда «Дарё» манбаси маълум қилди.
Манбанинг маълум қилишича, телеканалнинг эфирга чиқиши учун «қарийб ҳамма нарса тайёр», ҳозирда телеканалнинг логотипини ишлаб чиқиш бўйича сўнгги ишлар олиб борилмоқда.
Аввалроқ «Ўзбекистон 24» телерадиоканали эфир дастурларини ишлаб чиқиш доирасида телерадиоканал, «Тараққиёт стратегияси маркази» ва Халқаро пресс-клуб ўртасида ўзаро ҳамкорлик тўғрисида меморандум имзолангани ҳақида хабар берилган эди.
ЎзМТРКнинг «Диёр» телеканали ўрнида «Ўзбекистон 24» телеканали ташкил этилиши ҳақида 2 май куни маълум бўлган эди. 4 май куни Ўзбекистон Президентининг ахборот-таҳлил телеканалини ташкил этиш тўғрисидаги қарори эълон қилинди.
Хорижда ҳам мухбирлик пунктларига эга бўладиган ва бутун республика бўйлаб кун-у тун эфирга узатиладиган янги каналга «Ўзбекистон» телеканалининг «Ахборот» информацион дастури собиқ бош муҳаррири Озод Ҳамидхўжаев раҳбар этиб тайинланган.
Аввалроқ бир қатор ОАВларда «Ўзбекистон 24» телеканали ўз фаолиятини 27 июндан — Матбуот ва оммавий ахборот воситалари ходимлари кунида бошлаши ҳақида хабар берилган эди, бироқ ЎзМТРК бу хабарларни тасдиқламаган эди.
«Ўзбекистон 24» телеканали эфирга чиқишни бошлаши билан «Ўзбекистон» телеканалидаги «Ахборот», «Ёшлар» телеканалидаги «Давр» ва Тошкент телеканалидаги «Пойтахт» информацион дастурлари ўз фаолиятини тўхтатади.
Изоҳ (0)