“O‘zbekiston 24” telekanali 2017-yilning iyun oyi oxirigacha ishga tushadi. Bu haqda “Daryo” manbasi ma’lum qildi.
Manbaning ma’lum qilishicha, telekanalning efirga chiqishi uchun “qariyb hamma narsa tayyor”, hozirda telekanalning logotipini ishlab chiqish bo‘yicha so‘nggi ishlar olib borilmoqda.
Avvalroq “O‘zbekiston 24” teleradiokanali efir dasturlarini ishlab chiqish doirasida teleradiokanal, “Taraqqiyot strategiyasi markazi” va Xalqaro press-klub o‘rtasida o‘zaro hamkorlik to‘g‘risida memorandum imzolangani haqida xabar berilgan edi.
O‘zMTRKning “Diyor” telekanali o‘rnida “O‘zbekiston 24” telekanali tashkil etilishi haqida 2-may kuni ma’lum bo‘lgan edi. 4-may kuni O‘zbekiston Prezidentining axborot-tahlil telekanalini tashkil etish to‘g‘risidagi qarori e’lon qilindi.
Xorijda ham muxbirlik punktlariga ega bo‘ladigan va butun respublika bo‘ylab kun-u tun efirga uzatiladigan yangi kanalga “O‘zbekiston” telekanalining “Axborot” informatsion dasturi sobiq bosh muharriri Ozod Hamidxo‘jayev rahbar etib tayinlangan.
Avvalroq bir qator OAVlarda “O‘zbekiston 24” telekanali o‘z faoliyatini 27-iyundan — Matbuot va ommaviy axborot vositalari xodimlari kunida boshlashi haqida xabar berilgan edi, biroq O‘zMTRK bu xabarlarni tasdiqlamagan edi.
“O‘zbekiston 24” telekanali efirga chiqishni boshlashi bilan “O‘zbekiston” telekanalidagi “Axborot”, “Yoshlar” telekanalidagi “Davr” va Toshkent telekanalidagi “Poytaxt” informatsion dasturlari o‘z faoliyatini to‘xtatadi.
Izoh (0)