Вазирлар Маҳкамасида 2017 йил 9 июнда Ўзбекистон Президентининг «Ўзбекистон Республикасини янада ривожлантириш бўйича Ҳаракатлар стратегияси тўғрисида»ги Фармонига мувофиқ ташкил этилган Ижтимоий соҳани ривожлантиришнинг устувор йўналишларини амалга ошириш бўйича Комиссия мажлиси бўлиб ўтди. Бу ҳақда Халқаро пресс-клуб «Дарё»га маълум қилди.
Аҳоли бандлигини таъминлаш, ижтимоий ва таълим тизимидаги объектларни капитал таъмирдан чиқариш, арзонлаштирилган уй-жойлар қурилиши каби дастурларни амалга ошириш масалалари муҳокама марказида бўлди.
Мажлисда вазирлик ва идоралар раҳбарларидан ташқари, вилоят ҳокимликларининг мутасаддилари, жамоат ташкилотлари вакиллари, сенаторлар ва депутатлар иштирок этди. Бундай кенг форматда қилинган ишлар, йўл қўйилаётган сусткашликларни очиқ ойдин муҳокама қилиб, жойида муаммоларга тезкор ечим йўлларини топиш, таклиф ва ташаббуслар киритиш имконини берди.
Комиссия таҳлилига кўра, дастлабки беш ой давомида ижтимоий соҳани ривожлантириш борасида белгиланган вазифалар баъзи йўналишларда анча оқсоқликлар билан бажарилмоқда. Мутассаддилар бу муаммоларга жиддий қараши, ҳисобот даврини кутмасдан, олдиндан вазиятни тўғрилашга ҳаракат қилиши кераклиги таъкидланди.
Мактаб ва коллежлар, тиббий муассасалар ва ижтимоий объектлар капитал таъмирланиши, қурилиш ва реконструкция масалаларида ҳам бир қанча муаммолар бор. Бунинг сабаблари, қандай чоралар кўрилаётгани ва қандай таклифлар бор, деган саволларга Ўзбекистон Республикаси Бандлик ва меҳнат муносабатлари, Халқ таълими, Соғлиқни сақлаш вазирликлари, ҳокимиятлар вакиллари жавоб берди.
Аҳолини арзонлаштирилган уй-жойлар билан таъминлаш, хусусан, 2017 йил давомида 15 мингта турар жой уйларини барпо этиш масаласи жиддий муҳокамаларга сабаб бўлди. Таҳлил натижаларига кўра, 1-июнга қадар мамлакат бўйлаб 13 мингта уй-жойлари фақат пойдевор қўйиш босқичида турибди. Шу билан бирга, аввал қуриб топширилган баъзи уйларнинг сифати, инфратузилмаси – ичимлик сув, электр таъминоти, табиий газнинг етишмаслиги, ички йўллар масалалари аҳолининг мурожаатларига сабаб бўлмоқда. Бу борада ҳужжатларнинг вақтида тайёрланмаслиги, молиялаштириш ва умуман қурилиш соҳасини ривожлантиришдаги тўсқинликлар ўртага қўйилди.
Айтиш жоизки, муҳокамалар айбдорларни излаш эмас, балки масалаларнинг очиқ-ойдин ўртага олиб чиқилиши, сабаблари аниқланиши, тўсиқларнинг олдини олиш ва муаммоларни ҳал этиш йўлларини излашга қаратилди. Шу тариқа «Ўзбекистон Республикасини янада ривожлантириш бўйича Ҳаракатлар стратегияси»да ижтимоий соҳани ривожлантириш бўйича қўйилган вазифалар қоғозда эмас, амалда бажарилиши зарур деган хулосага келинди. Бу натижалар охир-оқибат одамлар ҳаётида акс этиши керак. Комиссия қошида 5 та кичик комиссия ташкил этиб, тезкор равишда жараённи ўрганиш ва ечимлар топиш борасидаги таклиф қўллаб-қувватланди. Яқин орада ҳар бир йўналиш бўйича «йўл хариталари» ва дастурлар ижроси бўйича аниқ режалар тасдиқланишига келишиб олинди.
Изоҳ (0)