«Ўзбекистон 24» телерадиоканали, «Тараққиёт стратегияси маркази» ва Халқаро пресс-клуб ўртасида ўзаро ҳамкорлик тўғрисида меморандум имзоланди. Бу ҳақда «Тараққиёт стратегияси маркази» вакили «Дарё»га маълум қилди.
Ҳаракатлар стратегиясида назарда тутилган тадбирларни амалга ошириб борилиши тўғрисида аҳолини ва халқаро жамоатчиликни телеузатишнинг замонавий усуллардан фойдаланган ҳолда кенг хабардор қилиш, уларнинг фикр-мулоҳазаларини ёритиб бориш ва яна бошқа бир қанча йўналишлардаги саъй-ҳаракатларни бирлаштириш мақсадида уч тамонлама Меморандум имзоланди.
Ҳужжатга асосан «Ўзбекистон 24» телерадиоканали эфирларида Ўзбекистоннинг ички ва ташқи фаолиятига оид муҳим ижтимоий, иқтисодий, сиёсий ва маданий соҳаларга тааллуқли ахборотлар ҳамда ахборот-таҳлилий маҳсулотлар тайёрланади.
Шунингдек, турли долзарб мавзуларда муҳокамалар, матбуот анжуманлари, брифинглар, ижодий ва тематик кечалар, тақдимотлар, давра суҳбатлари фаол ташкил этилади ва оператив ёритиб борилади.
Янги ташкил этилаётган телерадиоканал дастури қаторидан Ҳаракатлар стратегияси назарда тутилган тадбирларнинг экспертлар ҳамда жамоатчилик ўртасида кенг муҳокама этилишига бағишланган кўрсатувлар, шунингдек, қонун, қонуности ва бошқа ҳужжатлар лойиҳалари юзасидан кенг жамоатчиликнинг таклиф, фикр ва мулоҳазаларини ёритишга қаратилган ток-шоулар жой олиши кўзда тутилган.
Изоҳ (0)