Аълочига «бешлик», баҳоси уч бўлганга «учлик» стипендия: Ўзбекистонда талабаларга стипендия тўлаш тартиби ўзгармайди

Ўзбекистонда талабаларга стипендия тўлаш тартиби ўзгармайди. Бу ҳақда Халқаро пресс-клубнинг 7 июнь куни бўлиб ўтган анжуманида Ўзбекистон олий ва ўрта махсус таълим вазири Иномжон Мажидов маълум қилди.

Бир муддат аввал ижтимоий тармоқларда ҳукумат талабаларга стипендия тўлаш тартибини ўзгартириш масаласини кўриб чиқаётгани ҳақида маълумотлар пайдо бўлган эди. Ўзгаришларга мувофиқ, талабаларга баҳосига қараб стипендия тўлаш тартиби бекор қилиниб, унинг ўрнига барча талабаларга, баҳосидан қатъий назар, бир хил миқдорда стипендия тўланиши лозим эди.

Халқаро пресс-клубнинг олий таълим истиқболларига бағишланган анжуманида стипендия ҳақидаги савол пресс-клуб ходими, айни вақтда Ўзбекистон Миллий университети талабаси Елена Чуянова томонидан берилди. Унинг айтишича, у аълочи ва шунга яраша «бешлик» стипендия олишни истайди.

Бу саволга жавоб бераркан, вазирнинг биринчи ўринбосари Иномжон Мажидов стипендияларни бир хиллаштириш масаласи ҳозирги кун тартибида йўқ эканини маълум қилди.

Биз нега масалани кўриб чиқдик? Биринчидан, бошқа давлатларда стипендия деган нарса йўқ. Мана шу стипендиянинг дифференсиациялашган ҳолати ОТМларнинг маъмуриятлари учун маълум бир муаммоларни келтириб чиқармоқда. Талабалар орасида баҳонинг ортидан қувиш ҳолатлари ва шу билан боғлиқ бошқа сабаблар бор.

Иномжон Мажидов, Ўзбекистон олий ва ўрта махсус таълим вазири биринчи ўринбосари

Мажидовнинг таъкидлашича, стипендиялар тўлаш тартиби ўзгарган тақдирда ҳам, уларнинг миқдори бир хил бўлмасди — ҳозирда уч категория («бешлик», «тўртлик» ва «учлик») асосида берилаётган бўлса, янги тартибда стипендиялар икки тартибда берилган бўларди. «Биринчи категория бўйича ҳамма бир хил — ҳозирги ‘тўртлик’ стипендия даражасида пул оларди, иккинчи категорияда эса ҳақиқат ҳам аълочи, фаол талабага оширилган стипендия берилиши кўзда тутилган эди», — дея қўшимча қилди Иномжон Мажидов.

Мавзу юзасидан Ўзбекистон Миллий университети ректори Авазхон Мараҳимов ҳам ўз фикрларини билдириб, ўқитувчиларга ялиниб, фақат стипендияси яхши бўлиши йўлида юқори баҳо олишга интиладиган талабаларни танқид қилди.

Мен талабаларнинг фаолиятига, эришган ютуқ, натижаларига қараб стипендия белгилаш тарафдориман. Домланинг кетидан қувиб, сўраб-сўраб баҳо олиш — бу баҳо эмас. Очиқ айтаман, шу масалада вазирликда бўлган муҳокамаларда янги таклифнинг жорий этилиши тарафдори эканимни билдирган эдим.

Модул тизимига ўтаётганимизда, ўқув-фан дастурларини қабул қилаётганимизда илғор халқаро стандартларни татбиқ этиш тарафдоримиз. Стипендияда-чи, билимга баҳо беришда-чи?

Менимча, вақти келди.

Авазжон Мараҳимов, Ўзбекистон Миллий университети ректори