Санъат ва маданият институти ҳузуридаги педагог кадрларни қайта тайёрлаш ва уларнинг малакасини ошириш тармоқ марказида Қирғизистоннинг Ўш шаҳридаги Бобур номли ўзбек мусиқали драма театридан келган тингловчиларга сертификатлар топширилди. Тадбирда Маданият вазирининг биринчи ўринбосари Минҳожиддин Мирзо (Ҳожиматов) иштирок этди. Бу ҳақда «Дарё»га вазирлик мутасаддилари маълум қилди.
Бобур номли ўзбек мусиқали драма театрининг 12 нафар актёр ва техник мутахассислари 22 майдан 5 июнга қадар марказда бўлди. Улар 2 ҳафта давомида актёрлик маҳорати, вокал техникаси, саҳна нутқи, пластика, ритмика, драматургия бўйича билимларини мустаҳкамлади.
Малака ошириш жараёнида меҳмонлар Ўзбек миллий академик драма театрида «Андишали келинчак», Муқимий номидаги ўзбек давлат мусиқий театрида «Тоҳир ва Зуҳра», «Лайли ва Мажнун», «Дийдор» театр-студиясида Баҳодир Йўлдошев томонидан саҳналаштирилган «Юлдузли тунлар», Wise медиа театр-студиясида «Биринчи бўса» спектаклларини томоша қилди.
Қирғизистонлик тингловчилар учун Ўзбекистон халқ артисти Эркин Комилов, Ўзбекистонда хизмат кўрсатган ёшлар мураббийси Мунаввара Абдуллаева билан учрашувлар ташкил қилинди. Ўзбекистон тарихи давлат музейи, «Истиқлол» ва «Туркистон» саройлари, Алишер Навоий номли Ўзбекистон миллий боғи ҳамда пойтахтнинг бошқа диққатга сазовор жойларига саёҳатлар уюштирилди.
Изоҳ (0)