Ўзбекистоннинг Жанубий Кореядаги элчихонаси томонидан Туризмни ривожлантириш давлат қўмитаси, «Ўзбекистон ҳаво йўллари» миллий авиакомпанияси билан ҳамкорликда ташкил қилинган тадбирда етакчи сайёҳлик компаниялари, вазирлик ва идораларнинг 200 дан ортиқ вакили қатнашди. Бу ҳақда ЎзА хабар берди.
Тадбир иштирокчиларига Ўзбекистонда туризм соҳасини ривожлантириш, инфратузилмани такомиллаштириш ва модернизация қилиш, меҳмонлар учун хизмат кўрсатиш сифатини яхшилаш ва қулай шарт-шароитлар яратиш бўйича бажарилаётган ишлар хусусида батафсил маълумот берилди.
Экологик, экстремал, ов қилиш, гастрономик, даволаш-соғломлаштириш туризми, алпинизм, балиқ овлаш, байкинг каби турли дам олиш ва кўнгилочар тадбирлар уюштириш, Мўйноқ туманида халқаро туристик кластер ташкил этиш бўйича амалга оширилаётган чора-тадбирларга алоҳида эътибор қаратилди.
Корея Республикаси Туристик агентликлар ассоциацияси раиси Янг Му Сонг мазкур тадбир Жанубий Кореянинг туристик компаниялари ва жамоатчилиги вакилларига Ўзбекистоннинг сайёҳлик имкониятлари, жаҳонга машҳур архитектура ёдгорликлари ва турфа маданияти билан танишиш имконини берганини таъкидлади.
Корейс тилида намойиш этилган «Ўзбекистонга йўл» фильми иштирокчиларда катта қизиқиш уйғотди. Ташкил этилган фотоэкспозицияда иштирокчилар мамлакат табиати, қадимий шаҳарлари, ноёб архитектура ёдгорликлари, диққатга сазовор жойлари ва бугунги тараққиёти кўрсаткичлари билан танишди. Ўзбекистон халқининг бой маданияти ва анъаналарини очиб берган амалий-безак санъати буюмлари намойиши ҳам иштирокчилар эътиборини тортди.
Тадбир доирасида Ўзбекистон ва Жанубий Корея туроператорлари иштирокида B2B форматида ўтказилган учрашувларда мамлакатга сайёҳлар оқимини кўпайтиришга кўмаклашиш тўғрисида келишувга эришилди. Корея Республикасининг Chanel А ва SBS оммавий ахборот воситалари вакиллари Ўзбекистоннинг сайёҳлик салоҳияти билан таништириш учун Туризмни ривожлантириш давлат қўмитаси билан ўзаро манфаатли ҳамкорликни йўлга қўйишни режалаштирмоқда.
Изоҳ (0)