Тўртта араб мамлакати — Баҳрайн, Саудия Арабистони, Миср ва Бирлашган Араб Амирликлари 5 июнь, душанба куни эрталаб Қатар билан дипломатик алоқаларни узгани ҳақида эълон қилди, деб ёзади «РИА Новости».
Қўшни давлат билан алоқаларини узишини биринчи бўлиб Баҳрайн қироллиги маълум қилди. Орадан бир дақиқа ўтар-ўтмас, худди шундай чора-тадбирлар ҳақида Ар-Риёд, Қоҳира ва Абу-Даби эълон қилди.
Ўз навбатида Саудия Арабистони раҳбарлигидаги араб коалицияси қўмондонлиги Қатарнинг Ямандаги ҳарбий операциядаги иштироки якунланганини маълум қилди, бунга «Доҳанинг ноқонуний гуруҳлар, ‘Ал-Қоида’ ва ИШИДни қўллаб-қувватлаши» сабаб сифатида кўрсатилди.
Қатар ва унинг минтақадаги қўшнилари ўртасидаги зиддият Ар-Риёдда бўлиб ўтган Форс кўрфази мамлакатлари ва АҚШ саммитидан кейин юзага келди. Ўшанда Қатар янгиликлар агентлиги мамлакат амири номидан нутқ эълон қилган, унда Эрон билан алоқалар ўрнатиш ёқлаб чиқилган эди. Кейинроқ Қатар ТИВ расмий вакили агентлик сайтига хакерлар ҳужум қилиб, нутқни улар жойлаштирганини маълум қилди. Аммо Саудия Арабистони, БАА ва Баҳрайн бу раддияни ишончсиз деб топди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)