To‘rtta arab mamlakati — Bahrayn, Saudiya Arabistoni, Misr va Birlashgan Arab Amirliklari 5-iyun, dushanba kuni ertalab Qatar bilan diplomatik aloqalarni uzgani haqida e’lon qildi, deb yozadi “RIA Novosti”.
Qo‘shni davlat bilan aloqalarini uzishini birinchi bo‘lib Bahrayn qirolligi ma’lum qildi. Oradan bir daqiqa o‘tar-o‘tmas, xuddi shunday chora-tadbirlar haqida Ar-Riyod, Qohira va Abu-Dabi e’lon qildi.
O‘z navbatida Saudiya Arabistoni rahbarligidagi arab koalitsiyasi qo‘mondonligi Qatarning Yamandagi harbiy operatsiyadagi ishtiroki yakunlanganini ma’lum qildi, bunga “Dohaning noqonuniy guruhlar, ‘Al-Qoida’ va IShIDni qo‘llab-quvvatlashi” sabab sifatida ko‘rsatildi.
Qatar va uning mintaqadagi qo‘shnilari o‘rtasidagi ziddiyat Ar-Riyodda bo‘lib o‘tgan Fors ko‘rfazi mamlakatlari va AQSh sammitidan keyin yuzaga keldi. O‘shanda Qatar yangiliklar agentligi mamlakat amiri nomidan nutq e’lon qilgan, unda Eron bilan aloqalar o‘rnatish yoqlab chiqilgan edi. Keyinroq Qatar TIV rasmiy vakili agentlik saytiga xakerlar hujum qilib, nutqni ular joylashtirganini ma’lum qildi. Ammo Saudiya Arabistoni, BAA va Bahrayn bu raddiyani ishonchsiz deb topdi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)