Россия президенти Владимир Путин америкалик режиссёр Оливер Стоунга берган интервьюсида ўзининг хавфсизлик хизматига ишонишини маълум қилди, деб ёзади «Коммерсантъ». Суҳбатнинг тўлиқ версияси фильм кўринишида 12—15 июнь кунлари Showtime телеканали орқали намойиш этилади.
Оливер Стоун Россия президентига нисбатан беш марта суиқасд қилишга уринишганидан хабардорлигини айтди. «Аммо бу Фидель Кастрога уюштирилган суиқасдлардек кўп эмас. Менимча у бундай вазият билан 50 мартача тўқнаш келган», — деди режиссёр.
Владимир Путин бунга жавобан Фидель Кастро билан суиқасд мавзусида суҳбатлашганини айтди. Россия президенти сўзларига кўра, Куба собиқ раҳбари унга «доим ўз хавфсизлиги билан шахсан шуғуллангани учун» тирик эканлигини айтган.
«Мен ўз ишимни қиламан. Хавфсизлик ходимлари эса ўз ишини қилади, ва ҳозиргача улар буни анча муваффақиятли амалга ошириб келмоқда», — дея қайд этди Путин. У ўз соқчиларига ишонишини таъкидлади.
Изоҳ (0)