Москванинг Люблинский туман суди 31 май куни бизнесмен Алишер Усмоновнинг мухолифатчи Алексей Навальнийга нисбатан даъвоси бўйича ҳукм чиқарди, деб ёзади Meduza.
Усмонов уни ёмон отли қиладиган материалларни ўчиришни талаб қилган эди. Хусусан, миллиардер Навальний уни гўёки бош вазир Дмитрий Медведевга пора берганликда айблаганидан норози эди — бу ҳақда «У сизга Димон эмас» фильмида сўз борган эди.
Кўпчилик ОАВлар суд Алишер Усмоновнинг обрўсига путур етказган видеороликлар ва мақолаларни ўчириб ташлаш ҳақида қарор чиқарганини маълум қилди. Навальнийга бутун фильмни ўн кун муддат ичида ўчириб ташлаш юклатилди.
Алишер Усмоновнинг матбуот хизмати эса суд қарорини бошқача тушунди. Бизнесмен вакилларининг Meduza нашрига юборилган хатида даъвогарнинг талаби ва суд қарори билан жавобгар бутун фильмни эмас, унинг Усмонов обрўсини тўкадиган қисмларини ўчиришга мажбурлиги айтилади. Нашр таъкидлашича, Усмоновнинг даъвосида ҳақиқатан ҳам бутун фильмни эмас, унинг маълум бир парчаларини ўчириш ҳақида гап борган.
Навальнийнинг адвокати суд қарорида айнан «Усмоновнинг обрўсини туширадиган парчаларни ўчириш» деган жумладан фойдаланилиши мумкинлигини айтди. Унинг аниқлик киритишича, суд қарор матни ва суд залида янграган қарор ўртасида фарқлар бўлишига йўл қўймайди, аммо амалиётда шунақаси ҳам кузатилган.
Навальний «У сизга Димон эмас» фильмини ўчиришдан бош тортди ва суд қарори бекор қилинишига эришишга ваъда берди. Адвокат Ждановнинг сўзларига кўра, ҳукм матни ва судья эълон қилган қарор ўртасида фарқ борлиги тасдиқланса, бу «қарор бекор қилиниши учун яна бир асос бўла олади».
Суд қарор матнини томонларга беш иш куни ичида юборади.
Изоҳ (0)