Усмоновнинг жамоаси мемлар ва пародиялар танлови иштирокчиларининг илк ишларини эълон қилди
Бизнесмен Алишер Усмоновнинг жамоаси «ВКонтакте»даги махсус гуруҳга мемлар ва пародиялар иштирокчиларининг илк ишларини жойлади, деб ёзади Afisha Daily.
Биринчи танлов ишида кўз боғичи ишга солинди, уни сиёсатчи Алексей Навальний ўзига «зелёнка» билан ҳужумдан сўнг, кўзи куйиши натижасида тақишга мажбур бўлган эди.
Иккинчи ишда Навальний иштирок этишни режалаштирган 2018 йилги президент сайловлари ҳақида айтилади. Ролик шундай жумлалар билан якунланади: «Сен президент бўлмайсан. Мен тирик эканман, аниқ ҳеч қачон».
Бундан ташқари, Usmanov Challenge (танлов номи) ташкилотчилари алоҳида постда танлов ғолибларини саралаб олиш механикаси ҳақида гапириб берди.
«Ҳар ҳафта охирида битта ғолибни Алишер Бурхоновичнинг шахсан ўзи танлаб олади, иккинчисини танлаш эса сизга ҳавола этилади — постга қўйилган ҳар битта лайк битта овоз, ҳар бир репост эса — бешта овоз сифатида қабул қилинади», — дейилади хабарда.
Танловни қўллаб-қувватлаш жамоаси, шунингдек, мукофот жамғармаси икки марта оширилганини маълум қилди.
Аввалроқ Алишер Усмоновнинг у ҳақдаги энг яхши роликлар муаллифларига мукофот бериши тўғрисидаги гапларидан сўнг, интернет фойдаланувчилари оммавий тарзда уни мемлаштиришни бошлаган эди.
