Ироқ бош вазири тез орада ИШИД устидан ғалаба қозониши ҳақида маълум қилди

Ироқ бош вазири Ҳайдар ал-Обидий тез орада Мосулдаги ИШИД террорчилик гуруҳи жангарилари устидан ғалаба қозониши ҳақида маълум қилди. Бу ҳақда «Ас-Сумария» телеканали маълум қилди, деб ёзади «ТАСС».

«Қаҳрамонларимиз ҳаракатлари туфайли яқин вақт ичида ғалаба ҳақида эълон қилинади», — деди у ва операция якуний босқичда эканлигини таъкидлади.

Шу билан бирга, бош вазир бошқа давлатларга Ироқ суверенитетини ҳурмат қилиш ва мамлакат ички ишларига аралашмаслик талаблари билан мурожаат қилди.

Аввалроқ Ироқ армияси махсус топшириқли бўлинмалари, ИИВ тезкор кучлари ва Федерал полицияси АҚШ бошчилигидаги коалиция кўмагида 27 май, шанба куни Мосулнинг ғарбий қисмидаги ИШИДнинг сўнгги истеҳкомларига ҳужум бошлаганлиги маълум қилинган эди. Шаҳарнинг беш фоизга яқин ҳудуди террорчилар назорати остида эканлиги таъкидланмоқда.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.